YouTube-ը ներկայացրեց հեռուստաալիքների եթերային հեռարձակման դիտման նոր գործառույթը

YouTube տեսահոսթինգը ներկայացրել է իր հարթակում հեռուստաալիքների եթերային հեռարձակման դիտման՝ խոստացված գործառույթը: Նոր ծառայությունն ամերիկացի ինտերնետ-օգտատերերի համար մատչելի է դարձել ապրիլի 5-ին: Այժմ նրանք կարող են իրական ժամանակի ռեժիմով YouTube-ի միջոցով դիտել ԱՄՆ-ի չորս խոշորագույն հեռուստացանցեր (ABC, CBS, NBC եւ Fox), ինչպես նաեւ եւս շուրջ 30 կաբելային, ներառյալ մարզական հեռուստաալիքներ:

Ծառայությունը, ինչպես որ խոստացել էր տեսահոսթինգի սեփականատեր Alphabet հոլդինգը, տրամադրվում է ամսական 35 դոլար արժեքով վճարովի բաժանորդագրմամբ միանգամից վեց օգտատերերի: Այսպիսով, մեկ ընտանիքի միանգամից մի քանի անդամներ կարող են միաժամանակ ծառայությունից օգտվելու հնարավորություն ստանալ տարբեր հաշվառման գրանցումներից:

Ինչպես պարզաբանել են Alphabet-ում, ընկերությունը մտադիր է ներգրավել նրանց, ովքեր երբեք չեն ունեցել կաբելային կամ արբանյակային հեռուստատեսություն եւ ովքեր սովորել են տեսանյութեր, այդ թվում՝ հեռուստահաղորդումներ դիտել Համացանցի միջոցով:

2005 թվականին հիմնված YouTube-ը տեսահոսթինգային ընկերություն է, որը տրամադրում է տեսանյութերի պահման, առաքման եւ ցուցադրման ծառայություններ: Ծառայության օգտատերերը կարող են բեռնել, դիտել եւ մեկնաբանել տեսագրությունները: 2006 թվականին Google ընկերությունը գնել է YouTube-ը, իսկ Google-ը 2015 թվականից մտնում է Alphabet հոլդինգի կազմի մեջ, հաղորդել է ՏԱՍՍ-ը: