Եվրոպայի լիգայում հաղթելը այս մրցաշրջանում իմ նպատակներից մեկն է. Մխիթարյան

Հայաստանի ազգային հավքականի կիսապաշտպան Հենրիխ Մխիթարյանը «Մանչեսթեր Յունայթեդ»-ի հաղորդմանը տված հարցազրույցում խոսել է իր խաղի, ինչպես նաև Եվրոպայի լիգայում իր ելույթների մասին:

«Ես ինձ շատ լավ գիտեմ. կարող եմ ավելին անել: Ուզում եմ ասել, որ հաջորդ տարի ավելի շատ գոլեր և գոլային  փոխանցումներ կունենամ: Իհարկե, կարելի է բարելավել յուրաքանչյուր ասպեկտ: Չկա մի կողմ, որը կարող ես ասել լավ է և այլեւս չաշխատես դրա վրա: Պետք է շարունակես աշխատել խաղիդ յուրաքանչյուր կողմի վրա և բարելավես այն»:

Խոսելով Անգլիայի լիգայի գավաթի խաղարկության եզրափակչից բացակայելու մասին, Մխիթարյանը նշել է.

«Այո, բաց եմ թողել եզրափակիչը, բայց կարևորը, որ  թիմը հաղթել է: Ինձ համար թիմի հաղթանակն ավելի կարևոր է անհատական հաջողությունից: Ուրախ կլինեմ, որ այս տարի այլ եզրափակչի մասնակցեմ: Երբեք չգիտես, թե ինչ կլինի վաղը, մենք  կփորձենք դրական մտածել ու  ստանալ մեզ համար լավագույնը:

«Եվրոպայի լիգայում հաղթելը  այս մրցաշրջանում իմ նպատակներից մեկն է: Իհարկե գիտեմ, որ դա հեշտ չի լինելու, մանավանդ այս ֆուլում, երբ չկան հեշտ մրցակիցներ: Գիտենք, որ երկու բարդ խաղ ենք ունենալու  «Անդերլեխտ»-ի հետ: Կան մարդիկ, ովքեր կարծում են՝ մեզ համար հեշտ կլինի հաղթելը, բայց դա այդպես չէ: Մրցակցի խաղին հետևել եմ և կարող եմ ասել, որ նրանք շատ լավ են խաղում և բարձրակարգ ֆուտբոլիստներ ունեն»,- Մխիթարյանի խոսքը մեջբերում է մանչեսթերյան ակումբի կայքը: