Մեզ համար կարևոր չէ արդյունքը. Մոուրինյուն՝ «Մանչեսթեր Սիթի»-ի և «Ռեալ»-ի դեմ կայանալիք խաղերի մասին

«Մանչեսթեր Յունայթեդ»-ի գլխավոր մարզիչ Ժոզե Մոուրինյուն անդրադարձել է «Ռեալ Սոլթ Լեք»-ի նկատմամբ տարած հաղթանակին և ասել.

«Սա մինչմրցաշրջանային հատվածն է, այստեղ արդյունքն այդքան էլ կարևոր չէ: Մարդիկ  չափից շատ են ուշադրություն դարձնում արդյունքին: Ինձ համար կարևոր են թիմի մարզումները, զարգացումն ու խաղաժամանակը:

«Ռեալ Սոլթ Լեք»-ի դեմ խաղում ինձ դուր եկավ առաջին 30 րոպեն: Այն թիմը, որը խաղաց 35 րոպեն, լավ պատրաստված է, հիանալի հասկանում է խաղը, օգտագործում է իր ֆուտբոլիստների ուժեղ կողմերը: Ինձ դուր եկավ նրանց խաղը»: 

Խոսելով հավաքի ընթացքում «Մանչեսթեր Սիթի»-ի , «Ռեալ»-ի և «Բարսելոնա»-ի դեմ կայանալիք խաղերին, մարզիչը հավելել է.

«Մի քանի ֆուտբոլիստ կխաղան 60 րոպե «Մանչեսթեր Սիթի»-ի դեմ, իսկ հետո նրանք 30 րոպե կխաղան «Ռեալ»-ի դեմ: Կփորձեմ բոլորին խաղաժամանակ տալ, քանի որ դա շատ կարևոր է: Մարզումներին զբաղվում ենք տակտիկական աշխատանքով, հետո գնում ենք խաղի և իհարկե ձգտում ենք ցուցադրել այն, ինչ մշակել ենք մարզումներին:

Ակնհայտ է, որ «Սիթի»-ի, «Ռեալ»-ի, «Բարսելոնա»-ի մակարդակը Չեմպիոնների լիգայի մակարդակ է: Նրանց հետ խաղերը շատ օգտակար կլինեն մեզ համար: Չգիտեմ, թե ինչպես են պատրաստվում խաղերին նրանք, միգուցե նույն մոտեցումն ունեն, միգուցե՝ ոչ: Գիտեմ, որ «Մանչեսթեր Սիթի»-ի դեմ խաղը դերբի է, գիտեմ՝ «Ռեալ»-ը Եվրոպայի չեմպիոն է, բայց այդ խաղերի արդյունքները մեզ համար կարևոր չեն»,- Մոուրինյուի խոսքը մեջբերում է մանչեսթերյան թիմի կայքը:

Մանչեսթերցիները  կխաղան հուլիսի 20-ին՝ «Մանչեսթեր Սիթի»-ի, հուլիսի 23-ին՝ «Ռեալ»-ի, հուլիսի 26-ին՝ «Բարսելոնա»-ի հետ: