Լարված իրավիճակ Ֆիրդուսում․ շուկան ապամոնտաժում են

Հասարակություն 19 Հուլիս, 2017 11:10

Երևանի քաղաքապետարանի աշխատակիցներն այսօր առավոտյան ժամը 06:00-ից փորձում են ապամոնտաժել Ֆիրդուսի շուկան: Տների բնակիչներն ու տոնավաճառի աշխատակիցները փորձում են խոչընդոտել և բանակցել քաղաքապետարանի աշխատակիցների հետ՝ ապամոնտաժումը կասեցնելու համար, սակայն ապարդյուն։

«Մեզ թույլ չեն տալիս բացել տաղավարներն ու աշխատել։ Առանց մեր համաձայնության՝ մեզ տեղափոխում են «Երևան» տոնավաճառ՝ վեց ամիս առանց տեղավարձի աշխատելու։ Այսօր էլ առավոտը եկան, փակեցին բաժինները, որպեսզի սկսեն քանդման աշխատանքները»,- ԼՈւՐԵՐ․com-ի թղթակցի հետ զրույցում նշեց Ֆիրդուսի շուկայի աշխատակիցը։

Այս պահի դրությամբ՝ առևտրային տաղավարները փակ են, վաճառողներին թույլ չեն տալիս աշխատել: Թեև տեխնիկա էր բերվել քանդման աշխատանքներն իրականացնելու համար, սակայն, աշխատակիցներն ու բնակիչները թույլ չեն տալիս որևէ գործողոթւյուն իրականացնել:

Աշխատակիցների խոսքով՝ իրենց չեն զգուշացրել, որ առավոտյան պատրաստվում են ապամոնտաժել շուկան և այսօր իրենք անակնկալի են եկել:

Հիշեցնենք` հունիսի 5-ին Երևանի քաղաքապետ Տարոն Մարգարյանը տեղի ունեցած աշխատանքային խորհրդակցության ժամանակ անդրադարձել էր Ֆիրդուսի փողոցում գործող շուկայի առևտրականների հետագա գործունությանը: Հաշվի առնելով, որ առաջիկայում տվյալ տարածքում մեկնարկելու են շինարարական աշխատանքներ քաղաքապետը հանձնարարել էր բանակցել մայրաքաղաքում գործող տոնավաճառների և շուկաների սեփականատերերի հետ՝ վերոնշյալ առևտրականների գործունեությունն առևտրային այլ տարածքներ տեղափոխելու համար:

Սոնա Հարությունյան