Ամուսինս փորձում էր բռնաբարել 12-ամյա աղջկաս․ բռնության ենթարկված կանանց համար նոր օրենքը փրկօղակ է (տեսանյութ)

Ազգային ժողովը դեկտեմբերի 13-ի արտահերթ նիստում ձայների 75 կողմ, 12 դեմ և 8 ձեռնպահ հարաբերակցությամբ երկրորդ ընթերցմամբ և ամբողջությամբ ընդունել է «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագիծը:

«Ընտանիքում բռնության կանխարգելման մասին» օրենքը բռնության ենթարկվածների պաշտպանության երեք միջոց է նախատեսում՝ նախազգուշացում, անհետաձգելի միջամտության որոշում և պաշտպանության որոշում:

Սույն օրենքի առկայության անհրաժեշտության մասին «Առաջին լրատվական»-ը զրուցեց ընտանեկան բռնության ենթարկված կանանց հետ։

Ամուսնու ընտանիքում ֆիզիկական, սեռական, հոգեբանական բռնությունների ենթարկված կանանց գնահատմամբ՝ այսպիսի օրենքն ուղղակի անհրաժեշտություն է․ այն կարող է բազմաթիվ կանանց համար փրկարար օղակ հանդիսանալ։

Ընտանեկան բռնության ենթարկված կանանցից շատերն ապաստանել են «Արմենիան Լայթհաուս» բարեգործական հիմնադրամի հայաստանյան կենտրոնում։

«Այն կանայք, ովքեր գալիս են մեզ մոտ, նրանց տալիս ենք ոչ միայն ապաստան, այլ նրանք այստեղ մնալու ընթացքում ձեռք են բերում մասնագիտական տարբեր հմտություններ, որպեսզի կարողանան այստեղից դուրս գալուց հետո իրենց կյանքը դասավորել։ Այսօրվա դրությամբ՝ կենտրոնում ունենք 15 կին և 27 երեխա․ մեր կենտրոնում ընդունում ենք ոչ միայն հղի կանանց, այլ նաև երեխաներ ունեցողներին։ Ծրագիրը նախատեսված է այստեղ մինչև 2 տարի մնալու համար, բայց արդեն շուրջ 5 տարի է, որ մեզ մոտ գործում է նաև մեկ այլ ծրագիր, որը կոչվում է «Ապաստանից դուրս», այսինքն՝ այն կանայք, ովքեր 1-2 տարի ապրում են այստեղ, ապա դրանից հետո տեղափոխվում են այդ «Ապաստանից դուրս» ծրագրի շրջանակներ, որտեղ նրանք ունեն իրենց առանձին ապաստարանները, աշխատում են և ինքնուրույն հոգում են իրենց երեխաների ապրուստը»,- մեզ հետ զրույցում տեղեկացրեց «Արմենիան Լայթհաուս» կենտրոնի «Մայրատուն» ծրագրի մենեջեր Լիանա Սարգսյանը։

Մանրամասները՝ տեսանյութում։

Նյութի աղբյուր՝ 1.am