Դատավորները կտուգանեն փաստաբաններին․ նախագիծը կոռուպցիոն մեծ ռիսկեր է պարունակում

«Իրավաբանների և հոգեբանների միջազգային ասոցիացիա» ՀԿ նախագահ Խաչատուր Մարոզյանն ահազանգում է, որ Հայաստանում վտանգվում են փաստաբանների իրավունքները, մինչդեռ պետությունը պետք է աներ ամեն բան՝ փաստաբանների իրավունքների պաշտպանության համար․ «Անթույլատրելի է առաջարկվող նոր օրենսդրական նախագիծը, որով դատավորներին արտոնություն է տրվում՝ տուգանելու փաստաբաններին և դատախազներին։ Այսպիսով, դատարանում գործող ինստիտուցիոնալ անձանց հավասարակշռությունը խարխլվում է՝ հօգուտ դատավորների։ Այս խնդրի վտանգներն ու ռիսկերը, բանախոսների առաջարկները, դատարանի նկատմամբ վստահության հարցը, հարակից հարցեր»,-ընդգծում է Մարոզյանը և հավելում, որ նման օրենքի ընդունումը նշանակում է ժողովրդավարական սկզբունքներից նահանջ։ 

Ըստ Մարոզյանի՝ առաջարկվող նախագիծը մոտ է արդարադատության կործանման, մինչդեռ արդարադատությունը պետք է ծառայի ժողովրդին․ «Նման փորձով մենք ֆիքսում ենք, որ ընդհանրապես հաշվի չեն առնվել արտագաղթի, մարդկանց հուսալքության, սոցիալական բևեռացման գործառույթները, ու թույլի շահերը կրկին անկում են ապրում։ Այսպիսի ևս մեկ արտոնություն տալով, իշխանական օղակը կարծես ևս մեկ քայլ է անում վերջնականապես հայ ժողովրդին հուսալքելու, որ վերջնականապես կորցնի հավատը դեպի իր հայրենիքը, դեպի արդարադատությունը և թողնի հեռանա»,- ասաց «Իրավաբանների և հոգեբանների միջազգային ասոցիացիա» ՀԿ նախագահը։ 

Վերջինս նման օրենսդրական նախաձեռնության ետևում տեսնում է կոռուպցիոն մեծ ռիսկեր, որը այս որոշման ընդունումից հետո արդեն կբերի փաստաբանների և դատավորների մեջ պայմանավորվածությունների:

Մարոզյանը մատնանշեց, որ որպես պայքարի եղանակ՝ կառավարության շենքի առջև կհավաքվեն, ընդվզման ձայն կբարձրացնեն, սեմինարներ, հանդիպումներ կկազմակերպեն և այլն:

Անդրադառնալով այս նախագծի վերաբերյալ Փաստաբանների պալատի դիրքորոշմանը՝ նա նշեց, որ  Փաստաբանների պալատը դեռ որևէ հստակ դիրքրոշում չի հնչեցրել։ 

Հարցին՝ արդյո՞ք այս դրույթի տեղափոխումը «Դատավարական օրենսգիրք» փարատում է իր մտահոգությունները՝ իրավապաշտպանը նշեց, որ հարցի էությունը սրանով չի փոխվում, աչքակապություն է արվում:

Աղավնի Սուքիասյան