Աշոցքում անցկացվեց դահուկավազքի փառատոն

Հայաստանում Եվրոպական միության պատվիրակության  և Հայաստանի դահուկային սպորտի ֆեդերացիայի նախաձեռնությամբ  փետրվարի 3-4-ն Աշոցքի դահուկավազքի կենտրոնում կայացավ այդ մարզաձևի երկօրյա  փառատոն: Փառատոնը կազմակերպվել էր  Հայաստանում առաջին անգամ իրականացվող EUSportFest-ի շրջանակներում։

Բոլոր ցանկացողներին փառատոնի շրջանակներում սպասվում էին ակտիվ հանգստյան օրեր՝ դահուկային սպորտով հագեցած,  այդ թվում՝ պրոֆեսիոնալ մարզիչների դահուկավազքի վարպետության դասեր, ձմեռային խաղեր:  Փառատոնի ամփոփիչ միջոցառումը տեղի ունեցավ փետրվարի 4-ին.  անցկացվեց մանկական մրցաշար, տղամարդկանց 5  կմ և կանանց 2,5 կմ դահուկային մրցավազք՝ դասական ոճով: Միջոցառմանը մասնակցում էին ինչպես Շիրակի ու Լոռու մարզասերները, այնպես էլ տարբեր երկրների ներկայացուցիչներ:

Փառատոնին ներկա էին Հայաստանում ԵՄ պատվիրակության ղեկավար, դեսպանՊյոտր Սվիտալսկին,  ՀՀ տնտեսական զարգացման և ներդրումների նախարարության Զբոսաշրջության պետական կոմիտեի նախագահ Զարմինե  Զեյթունցյանը, ՀՀ սպորտի և երիտասարդության հարցերի նախարար Հրաչյա Ռոստոմյանը, ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը, Շիրակի մարզպետ Արթուր Խաչատրյանը:  Միջոցառմանը մասնակցում էին տարբեր կառույցների ու համայնքների ներկայացուցիչներ, Շիրակի մարզպետարանի ողջ  աշխատակազմը:

 Փառատոնի ընթացքում իրենց  դահուկային հմտությունները ցույց տվեցին շատերը, այդ թվում՝ նաև ԵՄ պատվիրակության ղեկավարը, իսկ մինչ այդ դեսպանը, Զբոսաշրջության պետական կոմիտեի նախագահն և Շիրակի մարզպետը հանդես եկան համատեղ ճեպազրույցով, որի ժամանակ նշվեց, որ  Եվրամիության շնորհիվ Աշոցքը կվերածվի դահուկավազքի կենտրոնի:

«Եվրոպական միությունն այս ծրագրի մեջ ներգրավված է երկու պատճառով։ Առաջին պատճառն այն է, որ Հայաստանում մենք ցանկանում ենքխրախուսել առողջ ապրելակերպը՝  ՀՀ սպորտի և երիտասարդության նախարարության հետ միասին, և հուսով ենք, որ դահուկավազքը, որը գեղեցիկմարզաձև  է, ընտանիքների կարևոր ու անբաժանելի մասը կդառնա, իսկ երկրորդ պատճառն այն է, որ  մենք ցանկանում ենք օժանդակել  այստարածաշրջանի զարգացմանը,  հատկապես, Աշոցքի, Ամասիայի ու Արփիի»,- նշեց Պյոտր Սվիտալսկին:

«Շնորհակալություն ենք հայտում Եվրամիությունից՝ Շիրակն իրենց ուշադրության կենտրոնում պահելու համար: 2018 թվականին Եվրամիությանծրագրերը կնպաստեն մարզի զարգացմանը, այսինքն՝ Շիրակը դադարում է ընկալվել որպես մի մարզ, որն օգնության կարիք ունի, այլ դիտվում է որպեսմի մարզ, որն ունի զարգացման մեծ ներուժ»,- նշեց Շիրակի մարզպետը:

Միջոցառման հաջողության ու միջազգային չափանիշներին համապատասխանելու մասին վստահեցրեց Շիրակի մարզպետարանի մշակույթի ու սպորտի բաժնի պետՎաչագան Վարդանյանը: «Փառատոնն առաջին տարին էր անցկացվում, ու նպատակը Աշոցքը  դահուկավազքի կենտրոն դարձնելն է»,- նշեց պատասխանատուն՝  հավելելով, որ թեև Աշոցքում տարածքը բաց է, չկան ծառուղիներ։

Մրցումներում առավել աչքի ընկած մասնակիցներն արժանացան գավաթների ու պատվոգրերի:

Արմենուհի Մխոյան