«Ելք»-ի պայքարն ընդդեմ թանկացումների (լուսանկարներ)

Քիչ առաջ մեկնարկեց «Ելք» դաշինքի հանրահավաք-երթն ընդդեմ թանկացումների: Երթի հիմնական թեման Հարկային օրենսգիրքն է, որով բարձրանում է միջին խավի հարկային բեռը: Պայքարի կազմակերպիչներն այսօր հստակ ժամանակացույց  են ներկայացնելու, թե ինչպես են պատրաստվում կասեցնել թանկացումները: 

«Հունվարի 19-ին մեկնարկեց ընդդեմ թանկացումների երթ-ակցիան, որից հետո իշխանությունները հրավիրեցին լսումներ: Իսկ մենք ասում էինք, որ լսումների ընթացքում պետք է մասնագետները գան լուծումներ առաջարկեն: Լսումներն իբրև թե թանկացումները մեղմելու մասին էին, որը սակայն դարձավ ծիծաղելի միջոցառում և այնտեղ հայտարարվեց, որ գիտնականները պարզել են՝ կարագն ավելի պօգտակար է, քան ձեթը, և դա է պատճառը, որ կարագը թանկացել է:

Թանկացումները մեղմելու մի տարբերակ կա` ավելացնել քաղաքացու եկամուտը: Այս ընթացքում քաղաքացիների թոշակները, աշխատավարձերը չեն ավելացել: Այս ակցիաների հանրային ճնշումը մենք ուղղելու ենք խորհրդարանին և վաղը այնտեղ լինելու է ստորագրահավաք արտահերթ նիստ հրավիրելու համար, որի հետևանքով պետք է հարկային օրենսգրքում փոփոխություններ իրականցվեն»,- իր ելույթում ասաց «Ելք» խմբակցության անդամ Էդմոն Մարուքյանը: 

2018 թ. հունվարի 1-ից ավելացել են սպառողական զանգվածի մի շարք ապրանքատեսակների գները, ինչպես նշում են «Ելք»-ի անդամները՝ թանկացումները շարունակական բնույթ են կրելու: 

Հիշեցնենք, որ դաշինքի նախորդ երթը տեղի ունեցավ հունվարի 19-ին, որի ժամանակ վերջիններս ելույթներ ունեցան, ապա երթ անցկացրեցին և որոշեցին մեկ անգամ ևս հավաքվել արդեն փետրվարի 5-ին: Այսօր 18։00-ին «Մոսկվա» կինոթատրոնի հրապարակը կրկին բազմամարդ է։ 

Հանրահավաքի երթուղին հետևյալն է․ Շառլ Ազնավուր հրապարակ-Աբովյան փողոց-Հանրապետության հրապարակ-Ամիրյան փողոց-Մաշտոցի փողոց-Սայաթ Նովա փողոց-Աբովյան փողոց-Շառլ Ազնավուր հրապարակ:

Սոնա Հարությունյան