Արամ Ա կաթողիկոսը կրկին մերժել է թուրքական հեռուստաընկերության առաջարկը

Վերջին ամիսների ընթացքում երկրորդ անգամ թուրքական արբանյակային հեռուստաընկերություններից մեկը դիմել է Մեծի Տանն Կիլիկիո Արամ Ա կաթողիկոսին հարցազրույց վերցնելու խնդրանքով։ Հարցազրույցը պիտի տևեր երկու ժամ, միջազգային հարցերի կողքին պիտի քննարկվեր նաև Հայկական հարցը, իսկ հաղորդումը պիտի թարգմանվեր հինգ լեզվով։ Հարցազրույցը պիտի վարեր թուրք ճանաչված լրագրող Ադնան Օքթարը։

Առաջին առաջարկը Մեծի Տանն Կիլիկիո Կաթողիկոսարանի մամլո և տեղեկատվական գրասենյակը մերժել էր առաջարկը՝ ասելով, որ Արամ Ա կաթողիկոսը չի ընդունելու որևէ նման առաջարկություն, քանի դեռ Թուրքիան չի ճանաչել Հայոց ցեղասպանությունն ու փոխհատուցում չի տրամադրել հայ ժողովրդին։ 

«Հայոց ցեղասպանությունը պատմական փաստ է և որպես այդպիսին՝ քննարկման, բանակցությունների, կամ երկխոսության առարկա չի կարող դառնալ: Թուրքիան պետք է ճանաչի 1915թ. հայ ժողովրդի դեմ իրականացված ցեղասպանությունը։ Դուք պետք է իմանաք, որ հազարավոր եկեղեցիներ, վանքեր, կրոնական հաստատություններ, մշակութային և սոցիալական հաստատություններ, հասարակական կենտրոններ (չհաշված անշարժ և շարժական գույքը) բռնագրավվել են Թուրքիայի կառավարության կողմից: Այդ ունեցվածքի վերադարձն իր օրինանական տերերին հայ ժողովրդի օրինական իրավունքն է: Հայ ժողովրդի իրավունքն արհամարհելով և մարդու իրավունքի պաշտպանությանն ուղղված նախաձեռնութուններին ագրեսիվ կերպով հակազդելով Թուրքիան չի կարողանա նպաստել մեր ժողովուրդների միջև փոխհամաձայնության ձեռքբերմանը»,- այսպիսի տողեր կային Արամ Ա կաթողիկոսի՝ առաջին հրավերին ի պատասխան գրված նամակում։

Այս նոր առաջարկության պաշտոնական տեքստում նշվում է, որ այն «բարեկամական առաջարկ է» և «Աստված ցանկանում է, որ մեր ժողովուրդների միջև հաշտություն լինի»։ Ավելին՝ Արամ Ա կաթողիկոսը հրավիրվում է Պոլիս, ուր նա իրեն «ավելի քան հանգիստ և ապահով պիտի զգա»։ Թուրքական հեռուստաընկերությունը կոչ է անում Վեհափառին դրական քայլով օրինակ ծառայելու։ Գրությունը եզրափակվում է հետևյալ խոսքերով. «Մեզ համար մեծ պատիվ է Արամ Ա կաթողիկոսին Պոլսում ընդունելը»։

Այս նամակն Անթիլիասը անպատասխան է թողել՝ հավատարիմ մնալով իր դիրքորոշմանը։