Գլենդելաբնակ հայերի բողոքի ակցիան «Հարսնաքար»-ի դեպքի կապակցությամբ (Տեսանյութ)

Երեկ Գլենդելի շուրջ 150 հայեր  Հայաստանի հյուպատոսության դիմաց բողոքի ակցիա են կազմակերպել  «Հարսնաքար»-ի դեպքի կապակցությամբ։

Նրանք փորձել են նամակ հանձնել հյուպատոս Գրիգոր Հովհաննիսյանին, սակայն շենքի փակ լինելու պատճառով  իրենց բողոքն են արտահայտել ՝ դարպասների վրա մահացածի լուսանկարները փակցնելով:

Նրանք պահանջել են, որպեսզի սպանության բոլոր մեղավորները ստանան իրենց արժանի պատիժը: Մասնավորապես ակցիայի կազմակերպիչներից Անահիտ Մարտիրոսյանն ընթերցել է գլենդելաբնակ հայերի հայտարարությունը, որը ներկայացնում են մասնակիորեն.

«Հայաստանում ստեղծված խայտառակ իրականությունը, անպատժելիության  կործանարար մթնոլորտը ստեղծել են ներկա իշխանությունները եւ նրանց հովանավորությունը, մարդասպանները, օլիգարխ պատգամավորները, նրանց պատժիչ բանդաները, եւ Ռուբեն Հայրապետյանի, նույն մականունավոր «Նեմեց Ռուբոյի» «Հարսնաքար» սպանդանոցում դաժան ծեծի հետեւանքով մահացավ ռազմական բժիշկ Վահե Ավետյանը՝ եւս մեկ հայ զինվոր: Արդեն նախկին իշխող հանրապետական «Նեմեց Ռուբոն» վաղուց է ապացուցել, որ ինքը ոչ միայն բռնության կողմնակից է, այլեւ՝ քարոզողը եւ կատարողը, եւ նա մի քանի տարի է տարբեր առիթներով անկաշկանդ հայտարարում է. «Չգիտե՞ք ես ինչ պտի անեմ, պտի ծեծեմ, պտի պատժեմ»: Եվ ահավասիք այս ամենը իրագործվում է իշխանությունների եւ հատկապես Սերժիկ Սարգսյանի անմիջական հովանավորությամբ, եւ նա նույնիսկ հրապարակայնորեն հայտարարեց պաշտպանել «Նեմեց Ռուբոյին»: Նույնը նաեւ Սամվել Ալեքսանյանի, մականունավոր «Լֆիկ Սամոյի» եւ մյուս օլիգարխների պարագայում:

Փաստորեն հովանավորում է հանցագործներին եւ ասվածի ապացույցն է նաեւ, որ «նախագահ կոչվածը» նույնիսկ ցավակցություն չհայտնեց եւ մինչ օրս որեւիցե խոսք անգամ չի ասել ռազմական բժիշկ Վահե Ավետյանի մահվան կապակցությամբ»:

Շարունակությունը կարող եք դիտել տեսանյութում: