Վարչապետի մամուլի խոսնակը, թողած մի շարք հարցեր, անդրադառնում է իմ հոր գումարներին. ArmDay կայքի տնօրեն

Այսօր ArmDay.am տնօրեն Տաթև Այվազյանը ֆեյսբուքյան իր էջում գրել էր.

«Հայաստանի Կառավարության լրատվականն ու խոսնակ- համատեղության կարգով պատգամավոր ընտրված, բայց դեռեւս ոչ մանդատավոր Արման Եղոյանը պարզվում է իր հիմնական գծից, ավելի ճիշտ քայլերից պարբերաբար շեղվելու մոլուցք ունի։ Երեկ Եղոյանը չգիտես ինչու, մոռանալով, որ պարզապես Նիկոլ Փաշինյանի խոսնակն է, որոշել էր զանգահարել ArmDay.am լրատվական կայք, եւ ներկայանալով որպես ՀՀ քաղաքացի (իհարկե չասաց, բայց հաստատ ՀՀ հպարտ քաղաքացի) հարցադրումներ էր անում, թե արդյո՞ք մեր լրատվական կայքը հրապարակել է իր գործունեության հաշվետվությունը։ Իհարկե, սա օրենքի պահանջն է, բայց արդյո՞ք այդ հարցի հասցեատերը Արման Եղոյանն է, իհարկե, ոչ։ Եղոյանին բարի խորհուրդ` զբաղվեք Ձեր աշխատանքով։ Ի վերջո, կողմնորոշվեք, դուք Նիկոլ Փաշինյանի խոսնակն ե՞ք, մանդատավոր, թե՞ ՀՀ հետաքրքրասեր քաղաքացի։ Ամեն դեպքում այս երեքից, որ մեկն էլ Ձեր սրտով լինի, նման հարցադրում անելու իրավունք չունեք։

Լավ մնացեք, եւ ուշադիր հետեւեք մեր հրապարակումներին, վստահաբար որպես ընթերցող, հատկապես հետաքրքրասեր ընթերցող կգտնեք Ձեզ հետաքրքրող հարցերի, այդ թվում եւ մեր լրատվական կայքի հաշվետվությունը»։

Politik.am-ը կապ հաստատեց Տաթև Այվազյանի հետ հասկանալու, թե ինչ է կատարվել: Տաթև Այվազյանն ասաց, որ Արման Եղոյանի զանգը, որպես քաղաքացի, իրավասություն չունի.

«Յուրաքանչյուր քաղաքացի չի կարող զանգել ՍՊԸ-ի տնօրենին ու հարցնել՝ ո՞վ է կայքի ֆինանսավորողը, որտեղի՞ց կայքին տրվող գումարները, և եթե իմ հայրն է վճարում այդ գումարները, ապա որտեղի՞ց: Սկզբից որպես վարչապետի մամուլի խոսնակ այդ հարցը ուղղեց, հետո, հասկանալով, որ ինքը իրավասություն չունի այդ հարցը տալու, փոխեց իր տակտիկան՝ ներկայանալով որպես պարզապես ՀՀ քաղաքացի:

Տաթև Այվազյանը ասաց նաև, որ գոյություն ունի օրենք, որ ինքը պարտավոր է հրապարակել կայքի ֆինանսավորումը, բայց Արման Եղոյանը այդ հարցի հասցեատերը չէ.

«Գոյություն ունեն Արդարադատության նախարարություն, և այլ համակարգեր, որոնք կարող են այդ հարցն ինձ ուղղել, ստանալ պատասխան, կամ, անգամ չստանալ պատասխան ու ինձ ենթարկել վարչական տույժի, որ կազմում է տարեկան 10.000 դրամ: Այսինքն՝ ես իրավունք ունեմ անգամ չհրապարակել այդ տեղեկատվությունը:

Արման Եղոյանին խորհուրդ կտամ զբաղվել այն առաքելությամբ, որն ինքը ստանձնել է՝ վարչապետի մամուլի խոսնակի պարտավորությունները: Եթե ինքը զանգում է լրատվական կայքի տնօրենին, խորհուրդ կտամ, որ պատշաճ ծանոթանա օրենքներին, և հասկանա՝ արդյո՞ք ինքը իրավունք ունի թեկուզ որպես ՀՀ հպարտ քաղաքացի այդ հարցն ինձ ուղղել:

Ցավում եմ, որ վարչապետի մամուլի խոսնակը, ներկա պահին թողած մի շարք հարցեր, անդրադառնում է ArmDay.am լրատվական կայքի գործունեությանը, ֆինանսավորմանը և իմ հոր գումարներին: Ես խորհուրդ կտամ Արման Եղոյանին, որ շատ ավելի կառուցողական մոտեցումներ փորձի գտնել ու հասկանալ, թե որտեղից կարող է ինքը սկսել իր աշխատանքը՝ արդյունքի հասնելու համար: Քանի որ հենց Հայաստանի հանրապետության հպարտ քաղաքացիներին են խոստացել, որ իրենք երջանիկ և բարեկեցիկ են ապրելու: Համենայնդեպս, այդ երջանկությունն ու բարեկեցությունը մեր լրատվական կայքից կամ մեր ֆինանսավորումից բխող բան չեն, որ ինքը կարողանա որոշել, թե դրանով շատ մեծ բան է անում»,-ասաց Տաթև Այվազյանը: