Ուշագրավ փոփոխություններ խոշոր հարկ վճարողների շարքում

Պետական եկամուտների կոմիտեն հրապարակեց 2018թ. երրորդ եռամսյակի 1000 խոշոր հարկատուների ցանկը, որում մի շարք ուշագրավ փոփոխություններ են տեղի ունեցել նախորդ տարվա նույն ժամանակահատվածում հրապարակված ցանկի համեմատ:

Այսպիսով՝ «Արմենիան Քափըր Փրոգրամ» ՓԲԸ-ն նախորդ տարվա համեմատ աննախադեպ աճ է գրանցել՝ 161-րդ հորիզոնականից անցնելով 17-րդին: Հատկանշական է, որ «Արմենիան Քափըր Փրոգրամն» առավել հայտնի է «Վալլեքս» անվանմամբ. սրա մեջ մտնում են Լոռու մարզի Ալավերդի քաղաքում գործող պղնձաձուլական գործարանն ու պղնձի հանքը: Ի դեպ՝ ամիսներ առաջ Ալավերդու պղնձաձուլական գործարանը դադարեցրեց իր գործունեությունը ծանր հարկերի և ՎՏԲ բանկի առջև ունեցած վարկային պարտավորությունների պատճառով և, փաստացի, 600-ից ավել քաղաքացիներ դարձան գործազուրկ: 

«Նորֆոլկ Քոնսալթինգ» ՍՊԸ-ն ևս աննախադեպ տեղաշարժ է կատարել՝ 37-ից անցնելով 12-րդի և այս տարի վճարել է 7 մլրդ 846 մլն 654 հազար դրամի հարկ: Նշենք, որ ՀՀ ԱԱԾ-ն կոռուպցիայի եւ տնտեսական հանցագործությունների դեմ պայքարին ուղղված՝ իր գործունեության շրջանակներում հանցավոր սխեմա է հայտնաբերել «Նորֆոլկ Քոնսալթինգ» ՍՊԸ-ում, որից հետո ընկերության տնօրենին պարտավորեցրին չվճարված 7 մլն դոլարը  որոշակի ժամկետում փոխանցել պետբյուջե:

Առավել ուշագրավ է նաև ԱԺ պատգամավոր Սամվել Ալեքսանյանի հետ փոխկապակցված «Ալեքս Հոլդինգ»-ի անդրդվելիությունը, քանի որ ինչպես նախորդ, այնպես էլ այս տարի, այն զբաղեցնում է 4-րդ հորիզոնականը և պետական բյուջե է վճարել 13 մլրդ 966 մլն 8 հազար դրամի չափով հարկ։ Սակայն, սա արվում է  այն դեպքում, երբ այս տարվա մայիսին Ազգային անվտանգության ծառայությունը խուզարկություններ էր իրականացրել «Ալեքս հոլդինգ» ՍՊԸ տարածքում և միլիոնների շարաշահումներ էր հայտնաբերել: Այս ամենը տարօրինակ է այնքանով, որ ստացվում է «Ալեքս հոլդինգի» հարկային սխեման կա՛մ նախորդ տարի ուռճացված է եղել, կա՛մ էլ այս տարի ավել հարկ չի վճարել՝ ի հեճուկս հայտնաբերված չարաշահումների:

Հաջորդը բենզինի ներկրմամբ զբաղվող «Սի ՓԻ Էս Օյլ Քորփորեյշն» ընկերությունն է, որը  նախորդ տարվա 7-րդ հորիզոնականից անցել է 5-րդ հորիզոնականը՝ վճարելով 13 մլրդ 175 մլն 854 հազար դրամ հարկ: Իսկ բենզինի մյուս խոշոր ներկրող «Ֆլեշ» ՍՊԸ-ն զբաղեցրել է 11-րդ հորիզոնականը, որը վճարել է 8 մլրդ 674 մլն 592 հազար դրամի հարկ: Ի դեպ, նախորդ տարի «Ֆլեշը» եղել է 10-րդ հորիզոնականում՝ վճարելով ավելի շատ հարկ, քան այս տարի:

Մյուս՝ ոչ պակաս ուշագրավ փոփոխությունները տեղի են ունեցել «Զանգեզուրի պղնձամոլիբդենային կոմբինատ» ընկերության հետ՝ 5-րդ հորիզոնականից անցնելով 1-ին հորիզոնականի և վճարելով 32 մլրդ 797 մլն 521 հազար դրամի հարկեր եւ տուրքեր: «Կապանի լեռնահարստացման կոմբինատը» 17-րդ հորիզոնականից անցել է 16-րդը՝ վճարելով 5 մլրդ 513 մլն 836 հազար դրամ հարկեր և տուրքեր:

Նշենք, որ ընդհանուր հաշվով 1000 խոշոր հարկատուներն առաջին ինն ամիսներին պետական բյուջե են մուտքագրել 672 մլրդ 132 մլն 118 հազար դրամի հարկ:

Արմինե ՄԻՔԱՅԵԼՅԱՆ