Զարուհի Մեջլումյանը ստացել է Մհեր Ենոքյանի ներման խնդրագրի պատասխանը

23 տարի առաջ ցմահ ազատազրկման դատապարտված Մհեր Ենոքյանի կինը՝ Զարուհի Մեջլումյանը ստացել է ամուսնու ներման խնդրագրի պատասխանը: Տեղեկությունը ԼՈւՐԵՐ.com-ի հետ զրույցում հաստատեց Մեջլումյանը:

Նա մի քանի ժամ նախարարության աշխատակիցներից պահանջել է իրեն տրամադրել ներման խնդրագրի պատասխանը:

Մեջլումյանը այլ մանրամասներ չցանկացավ հայտնել՝ նշելով, որ դրա վերաբերյալ վաղը հանդես կգա հայտարարությամբ:

Արդեն տեղեկացրել էինք, որ Մհեր Ենոքյանի ներման խնդրագրի վերաբերյալ Փաշինյանն իր դիրքորոշումը ներկայացրել է ՀՀ նախագահ Արմեն Սարգսյանին:

Նախագահի աշխատակազմի հայտարարության մեջ ասվում էր՝ ստացվել է մի շարք անձանց ներման խնդրագրերի վերաբերյալ վարչապետի առաջարկությունը և ստորագրվել համապատասխան հրամանագիրը:

Նշենք, որ «Ներման մասին» ՀՀ օրենքի 5-րդ հոդվածի համաձայն՝ Ներման հարցերի քննարկման խորհրդակցական հանձնաժողովը վարչապետին է ներկայացնում եզրակացություն ներման խնդրագրի վերաբերյալ, որից հետո վարչապետը հանրապետության նախագահին ներկայացնում է ներման խնդրագիր ներկայացրած անձին ներում շնորհելու կամ ներման շնորհումը մերժելու մասին առաջարկություն:

Հիշեցնենք, որ Մհեր Ենոքյանին մեղադրանք է առաջադրվել համակուրսեցի Իոսիֆ Աղաջանովին սպանելու համար։ Նա 1996-ին նոյեմբերի 29-ին դատապարտվել է մահապատժի։ 

Սոնա Հարությունյան