Արդյոք Բալասանյանը կարո՞ղ է ծանոթանալ «Մարտի 1»-ի գործով նյութերին. պարզաբանում են ՀՔԾ-ից

Արցախի անվտանգության խորհրդի քարտուղար Վիտալի Բալասանյանը հայտարարություն էր տարածել՝ արձագանքելով հունվարի 28-ին Եռաբլուրում մարտիմեկյան իրադարձությունների վերաբերյալ իր հնչեցրած գնահատականներին ՀՔԾ պետ Սասուն Խաչատրյանի տված արձագանքին: Նա, մասնավորապես, նշել է. «Ընդունում եմ Սասուն Խաչատրյանի հրավերը՝ իրավական տեսանկյունից քննարկելու վերը նշված իրադարձությունները՝ գործի նյութերին ծանոթանալուց հետո»։ 

Սակայն ԼՈւՐԵՐ.com-ին ՀՔԾ-ից փոխանցեցին, որ Վիտալի Բալասանյանը չի կարող «Մարտի 1»-ի իրադարձությունների քրեական գործի նյութերին ծանոթանալ, քանի որ դրանց կարող են ծանոթանալ միայն դատավարության մասնակիցները, սահմանափակ թվով սուբյեկտներ՝ քրեական դատավարության օրենսգրքով սահմանված կարգով։ Իսկ քրեական գործերի նյութերին ծանոթանալու ընթացակարգը սահմանված է քրեական դատավարության օրենսգրքով։

Արդյոք ՀՔԾ պետը կընդունի՞ Բալասանյանի առաջարկը, եթե վերջինս ցանկություն հայտնի որևէ ձևաչափով բանավիճելու՝ հարցը ՀՔԾ-ից անպատասխան թողեցին:

Հիշեցնենք, որ հունվարի 28-ին «Եռաբլուր»-ում  լրագրողների հետ զրույցում, խոսելով ՀՔԾ պետի հայտարարության մասին, թե ժամկետային զինծառայող Տիգրան Աբգարյանը սպանվել է՝ արտակարգ դրություն մտցնելու հիմք ունենալու համար, Բալասանյանն ասել էր. «Ամոթ է, չի կարելի այդպիսի բաներ ասել: Էդ սահմանադրական կարգի տապալման հոդվածը մի քիչ ծիծաղելի է: Այսինքն՝ ո՞նց եք բան անում, էսօր Փաշինյանն ինքը սահմանադրական կարգը տապալի, որ մնա վարչապե՞տ, մի քիչ ծիծաղելի է: Սահմանադրական կարգը կտապալի այն ուժը, որն իշխանության չէ, իշխանության գտնվող ուժը ինչո՞ւ է սահմանադրական կարգ տապալում: Ովքեր արտահայտում են այդ բառերը, կարճ ժամանակից հետո շատ փիս վիճակի մեջ են ընկնելու»։ 

Արձագանքելով Բալասանյանի այս խոսքերին` ՀՔԾ պետը նշել էր՝ եթե Բալասանյանն ամոթանք է տվել, դա թողնում է նրա խղճին, իսկ եթե լուրջ իրավաբան է, ապա հրավիրում է՝ գա, նստի, քննարկեն իրաբավանական տեսանկյունից:

Սոնա Հարությունյան