ՎՏԲ բանկը 3 սենյականոց բնակարանը վաճառել է 490 000 դրամով․ պարզաբանում բանկից

ՎՏԲ բանկը բնակչի 3 սենյականոց բնակարանը վաճառել է 490 000 դրամով։ Այս մասին ԼՈւՐԵՐ․com-ի հետ զրույցում ասաց Կապանի Հալիձոր թաղամասի13 շենքի 42-ամյա բնակիչ Էրիկ Սողոմոնյանը: Վերջինս պատմեց, որ հայտնվել է անելանելի վիճակում. 3 երեխաների ու հիվանդ մոր հետ մնալու է դրսում։

«Առանց մեր իմացության՝ մայրս տունը գրավ է դրել 700 հազար դրամի դիմաց ու վարկ վերցրել ՎՏԲ բանկից։ Բայց քանի որ չի կարողացել վճարել, ՎՏԲ-ն դատարան է տվել, տունը գնահատվել է 6 մլն դրամ, որից հետո բանկը աճուրդի է դրել, գինը իջել է մինչև 490 հազար դրամ ու 3 սենյականոց բնակարանս վաճառվել է։ Ո՞վ ա տեսել՝ ջրի գնով վաճառեն»,- ասաց բնակիչը:

Նա պատմեց, որ ընդամենը մեկ ամիս առաջ է իմացել, որ տունն այլևս իրեն չի պատկանում․ «Հոսանքի վճարումները կատարելու համար էլեկտրիկն ասեց՝ տան փաստաթղթերը բեր, որ հոսանքը փոխեմ։ Տանը փնտրեցի, չգտա դակումենտները, գնացի կադաստր, թուղթ տվեցի, թե՝ տան սեփականատերը դու չես, այլ՝ Դավիթ Արզումանյանը»,- ասաց Էրիկ Սողոմոնյանը: 

Վերջինս նշեց, որ բազմիցս դիմել են տունը գնողին, որ վերադարձնի, բայց ապարդյուն․ «Մեկը կա՝ պատրաստ է վճարել 490 000-ը մենակ թե մենք դրսում չհայտնվենք, բայց սեփականատերը չի համաձայնվում, ասում է՝ 6000 դոլարից պակաս չի ծախում: Ես էլ ի վիճակի չեմ էդքան վճարեմ։ Մայրս 3 անգամ ինսուլտ է տարել, ծանր վիճակում է: Տղես բանակ պիտի գնա, չգիտեմ էլ, թե ինչ հասցեի տակ են տանելու բանակ։ Կինս մահացել է, երեխաներս իմ հույսին են, հիմա ես ո՞ւր գնամ: Ես լսեմ եմ՝ տունը գնողը պատրաստվում ա գնա Հայաստանից, հեսա տունս կվաճառի, կգնա, բա ես ո՞ւր գնամ»,- նշեց նա՝ ավելացնելով, որ մինչև վարչապետի մոտ էլ գնալու է՝ միայն թե տունը նորից իրենը լինի։

ԼՈւՐԵՐ․com—ը պարզաբանում ստացավ նաև ՎՏԲ բանկից, որտեղից տեղեկացրին, որ 2014 թ-ին Թամարա Աղաթելյանը «ՎՏԲ-Հայաստան Բանկ» ՓԲԸ-ից վերցրել է 770.000 ՀՀ դրամի վարկ՝ առանց գրավի․ «Վարկառուն չի կատարել Բանկի հանդեպ իր վարկային պարտավորություններն առաջին իսկ օրվանից, ինչի արդյունքում Բանկը 2015թ.-ին ՀՀ օրենսդրությամբ սահմանված կարգով իր շահերը պաշտպանելու նպատակով հայց է ներկայացրել դատարան: Բանկը Թ. Աղաթելյանի հետ բանակցություններ է վարել հաշտության պայմանագիր կնքելու նպատակով, սակայն այն հաճախորդի կողմից այդպես էլ չի կնքվել: 2016 թ-ին դատարանի վճռի հիման վրա՝ ՀՀ օրենսդրությամբ սահմանված կարգով, ստացված կատարողական թերթն ուղարկվել է ՀՀ Արդարադատության նախարարության Հարկադիր կատարման ապահովման ծառայություն: Գումարի հետագա բռնագանձումը (այդ թվում` արգելադրված գույքերը աճուրդի դնելը և աճուրդով գույքի գինը իջեցնելը և վերջնական վաճառքը) իրականացվում են Հարկադիր կատարման ապահովման ծառայության կողմից ՀՀ օրենսդրությամբ սահմանված կարգով»,- փոխանցեցեին ՎՏԲ-ից՝ ընդգծելով, որ այդ գործընթացների իրականացմանը բանկը որևէ մասնակցություն չունի։

Սոնա Հարությունյան