Փաշինյանը մի բան է ասում, Կարապետյանը՝ այլ բան անում. գազի գինը մնում է առկախված

Մամուլում ակտիվ շրջանառվում է տեղեկությունը, թե «Գազպրոմ Արմենիա»-ն չի պատրաստվում իր ծախսերի կրճատման հաշվին սուբսիդավորել Ռուսաստանից արդեն 165 դոլարով ներկրվող գազը: Ավելին՝ նշվում է, որ այս հարցով ՀՀ կառավարությունը ընկերության հետ նույնիսկ բանակցություններ չի վարել:

«Գազպրոմ Արմենիա» ՓԲԸ հասարակայնության և ԶԼՄ-ներիի հետ կապերի ծառայության պետ Միխայիլ Հարությունյանը ԼՈՒՐԵՐ.com-ի գրավոր հարցմանն ի պատասխան  մանրամասնեց .«Հաշվի առնելով ՀՀ առաքվող բնական գազի գնի փոփոխությամբ պայմանավորված նեղ մասնագիտական ուսումնասիրություններ անցկացնելու անհրաժեշտությունը, ընկերության, որպես բնական գազ մատակարարող կազմակերպության կողմից սպառողներին վաճառվող բնական գազի սակագների կառուցվածքում ներառվելիք Ընկերության սակագնային մարժայի (ներառյալ դրա հաշվարկի համար անհրաժեշտ ցուցանիշների) մեծության վերաբերյալ որոշումներ կայացնելու նպատակով՝ ներկայումս աշխատանքային քննարկումներ են անցկացվում Էներգետիկայի բնագավառում ՀՀ կառավարության լիազորած մարմնի, ՀՀ հանրային ծառայությունները կարգավորող հանձնաժողովի  և «Գազպրոմ Արմենիա» ՓԲԸ-ի համապատասխան մասնագետների մասնակցությամբ»:

Միխայիլ Հարությունյանի խոսքով՝ լրացուցիչ տեղեկատվություն կտրվի նշված աշխատանքային քննարկումների ավարտից հետո միայն:

Նկատենք, որ ՀՀ վարչապետ Նիկոլ Փաշինյանը՝ անցյալ տարվա դեկտեմբերի վերջին, երբ հայտնի դարձավ, որ ռուսական «Գազպրոմ» պետական ընկերությունը 10 տոկոսով թան­կացնում է Հայաստան մատակարարվող գազի գինը՝ 150-ից դարձնելով 165 դոլար, հայտարարել էր. «Գազի գինը սպառողների համար չի բարձրանա, իսկ տարբերությունը կփոխհատուցի «Գազպրոմ Արմենիա»-ն՝ ծախ­սերի կրճատման հաշվին»: 

Ստացվում է, որ վարչապետ Փաշինյանը, առանց «Գազպրոմ Արմենիա» ՓԲԸ հետ բանակցություններ վարելու և վերջանական արդյունքի հասնելու՝ կրքերը հանդարտեցնելու համար հայտարարում է մի բան, որը դեռ քննարկման փուլում է, և որի մասով որոշում չկա:

Հիշեցնենք, որ ՀՀ նախկին վարչապետ Կարեն Կարապետյանն օրերս ժամանել էր Հայաստան, որից հետո գազի գնի սուբսիդավորման վերաբերյալ նման տեղեկություն է տարածվում: Թե ինչքանով է Կարեն Կարապետյանը փոխել բանակցությունների հունը և Փաշինյանի պլանները, պարզ կլինի քննարկումներից հետո:

Արմինե ՄԻՔԱՅԵԼՅԱՆ