Արսեն Թորոսյանի կադրի դեմ քրգործ է հարուցվել

Քիչ առաջ Քննչական կոմիտեն հայտարարություն տարածեց, որ Քննչական կոմիտեի Տավուշի մարզային քննչական վարչությունում 2019 թվականի հունվարի 16-ին վարույթ է ընդունվել 2019 թվականի հունվարի 8-ին ՀՀ ոստիկանության Իջևանի բաժնում ՀՀ քրեական օրենսգրքի 178-րդ հոդվածի 2-րդ մասի 1.1 և 2-րդ մասի հատկանիշներով հարուցված քրեական գործը:

Նախնական տվյալներով՝ Իջևան քաղաքի բնակիչը Ոստիկանության Իջևանի բաժնում հաղորդում է ներկայացրել, որ Իջևան ԲԿ ՓԲԸ-ի նախկին տնօրենը, 2015 թվականի ամռանը, իրեն հիշյալ ԲԿ-ում աշխատանքի տեղավորելու համար պահանջել և ստացել է 3 հազար ԱՄՆ դոլար, սակայն չկատարելով խոստումը, հափշտակել է գումարը:

Հիշեցնենք, որ ըստ մամուլի հրապարակումների՝ Նարեկ Վանեսյանն առողջապահության նախարար Արսեն Թորոսյանի մտերիմ ընկերն է և պաշտոնի նշանակվել էր Թորոսյանի նախարար դառնալուց հետո, սակայն հայտնվեց սկանդալի կիզակետում, որից հետո հրաժարական տվեց։