Օսիպյանի կողմից կա և՛ անձնական քինախնդրություն, և՛ քաղաքական մոտեցում. Ալեք Ենիգոմշյան

Այսօր «Սասնա Ծռեր» խմբի 10 անդամների գործով դատական նիստն անցել է լարված մթնոլորտում։ Նախ ոստիկանապետ Վալերի Օսիպյանը առարկել է, որ  «Սասնա Ծռերի» նկատմամբ համաներում կիրառվի՝ նշելով, որ ընկերներ է կորցրել։ Այնուհետև, ՀՀ նախկին փոխոստիկանապետ Վարդան Եղիազարյանի հարցաքննության ժամանակ է ստեղծվել լարված իրավիճակ․ Եղիազարյանի ելույթի ժամանակ խմբի անդամներից Սմբատ Բարսեղյանն ընդհատել է նրան և երկրորդ անգամ նկատողություն ստանալուց հետո հեռացվել է դահլիճից, որից հետո դատավոր Մեսրոպ Մակյանը նիստը դռնփակ անցկացնելու որոշում է կայացրել:

ԼՈՒՐԵՐ.com-ի թղթակցի հետ զրույցում «Հիմնադիր խորհրդարանի» անդամ Ալեք Ենիգոմշյանն այսօր տեղի ունեցած դատական նիստի մասին խոսելով նկատեց, որ դատավորի որոշումը պետք է կայացված լիներ դեռևս երեկ, երբ լրացել էր նախագահի կողմից Համաներման մասին օրենքը ստորագրելուց հետո երեք ամիս․ «Երեք ամիսն իրականում երեկ ավարտվեց։ Այստեղ կա խախտում, որովհետև երեկ պետք է դատավորը հայատարարեր, որ երեք ամիսն ավարտվել է, բողոքարկում չի եղել, հետևաբար, օրենքը պետք է տարածված լիներ «Սասնա Ծռերի» վրա։ Խախտումից հետո, այսօր պարոն Օսիպյանը հրավիրվում է և տալիս է իր ցուցմունքը։ Անգամ եթե ասեն, որ երեք ամիսն այսօր է լրանում, այսօրվա դատական նիստի ավարտից հետո առաջիկա ժամերին դատավորը որոշումը պետք է հրապարակի։ Հակառակ դեպքում՝ ստիպված եմ այսպիսի լուրջ կասկածներ ունենալ, որ սա օրենքի խախտում է»,- ասաց Ենիգոմշյանը։

Ստեղծված իրավիճակում Ենիգոմշյանն այնքան էլ լավատեսորեն չի տրամադրված, որ դատավորը համաներման դրական որոշում կկայացնի․ «Դատավորի այսօրվա պահվածքից՝ և՛ Սմբատ Բարսեղյանին նիստերի դահլիճից դուրս հրավիրելուց, և՛ նիստերը դռնփակ հայտարարելուց՝ դրական ակնկալիքներ չունենք»։

Անդրադառնալով ոստիկանապետի կողմից հնչեցրած մտքերին՝ Ենիգոմշյանը նկատեց, որ  իրենց համար թեև անսպասելի չէ, սակայն այս ամենը նրանց ենթադրելու տեղիք է տալիս, որ Օսիպյանի կողմից կա և՛ անձնական քինախնդրություն, որը հիմնավորված չէ, և նաև քաղաքական մոտեցում՝ պահելու մեղադրանքները խմբի բոլոր անդամների վրա։ «Պարոն Օսիպյանի այսօրվա հայտարությունը, որտեղ նա ասում է, որ բողոքարկում է համաներման օրենքը, եթե հիմք ընդունի դատավորը, դա նշանակում է, որ համաներումը չի տարածվում ոչ միայն խմբի անդամների վրա, այլ «Սասնա Ծռերի»-ի գործին անհասկանալի կերպով միացված 2015 թվականի ապրիլի գործի վրա։ Պարոն Օսիպյանի այդ անսովոր և անհեթեթ հայտարարության հիման վրա՝ այդ գործը ևս չի կարճվելու։ Դա անհեթեթության գագաթնակետն է»,- ավելացրեց Ենիգոմշյանը։

Հիշեցնենք, որ Համաներման մասին օրենքի նախագծով նախատեսվում է պատժից ազատել ՊՊԾ գնդի տարածքում հանցագործություն կատարած, վերջիններիս հետ հանցակցած, այդ նպատակով  հանցափորձ կամ հանցագործության նախապատրաստություն, հարակից տարածքներում դրանց հետ առնչություն ունեցող հանցագործություն կատարած «Սասնա Ծռեր» խմբի այն անդամներին, ովքեր չեն մեղադրվում սպանություն կատարելու մեջ եւ եթե համաներման  դեմ չեն առարկում պատանդառված եւ ֆիզիկական վնաս կրած տուժողները:   

Արմինե ԱՐՄԵՆԱԿՅԱՆ