Նոր Հայաստանի իրականությունը. գործարարի «օդերը փակում են»

Ըստ քաղաքապետ Հայկ Մարությանի վերջնական որոշման՝ սկսվել է Երեւանում կանաչ տարածքների վերականգնման եւ զարգացման գործընթացը, որն իր մեջ ներառում է նաև Օպերայի հարակից տարածքում «քաղաքի սեփականությունը հանդիսացող հողամասերը վարձակալած եւ բիզնես ծավալած տնտեսվարողների» սրճարանները։ Քաղաքապետարանը պլանավորել է այս տարվա սկզբից կանաչապատել տարածքը՝ այն բետոնյա ծածկույթից ազատելուց հետո։

Ավելին՝ Առողջապահության նախարարությունն էլ իր հերթին ծխելու դեմ պայքարի շրջանակներում որոշել է արգելել նաև նարգիլեի օգտագործումը: Այս կոնտեքստում բավականին հետաքրքիր պատկեր է ստացվել, ՀՀ քաղաքացի Ալեքսանդր Իսկանդարյանը, որին պատկանում է Օպերայի տարածքում գործող «Մոնտալ» սրճարանն ու քաղաքի մեկ այլ հատվածում գործող «Հուկա Բոսս» սրճարանը, որտեղ շատերը գնում են հենց նարգիլե վայելելու համար, այս պահին լուրջ խնդրի առաջ է կանգնած: Ստացվում է, որ տվյալ տնտեսվարողը Առողջապահության նախարարության նախագծով և քաղաքապետարանի որոշմամբ զրկվում է սեփական բիզնեսից: 

«Եթե քաղաքապետարանի որոշմամբ մեր հարևան սրճարանների մի մասն է քանդվում, ապա մեր սրճարանն ամբողջությամբ է քանդվում և մենք ոչ մի աթոռ չենք կարողանալու դնել ու աշխատել, թողնում են  26 քառակուսի տարածք, որը խոհանոցային մասն է և չկա սպասարկման տարածք: Մեր սրճարանը սովետական տարիներից է սարքվել ու Երևանի հին ու բարի «մառոժնիանոցն» է, ոչ զավթել ենք տարածքը, ոչ էլ անօրինական այլ ճանապարհներով ենք ձեռք բերել: Փաստացի մենք դառնում ենք զոհ, որովհետև մեր գլխին տեր չկա ու մեջք չունենք,  քանի որ Օպերայի տարածքից սրճարաններն, այնուամենայնիվ, չեն վերանում»,- ԼՈՒՐԵՐ.com-ի հետ զրույցում  ասաց Ալեքսանդր Իսկանդարյանը: 

Մեր զրուցակիցը նշում է նաև, որ առաջարկով է հանդես եկել՝ սեփական միջոցների հաշվին  տարածքը կանաչապատելու համար, սակայն հստակ պատասխան չի ստացել: Իսկանդարյանը դեռևս չի որոշել, թե առաջիկայում ինչ քայլեր է ձեռնարկելու քաղաքապետարանի տվյալ որոշման մասով.«Ես դեռ սպասում եմ իրենց ասած հանդիպում-քննարկմանը, այսօր կրկին զանգահարել էին դրա համար, այդ հանդիպումից շատ բան պարզ կլինի»:

Ինչ վերաբերում է Իսկանդարյանի մյուս բիզնեսին՝ «Հուկա Բոսս»-ին, մեր զրուցակիցը նշեց. «Առողջապահության նախարարությունն ասում է, որ արգելելու է ու վերջ, բայց նա ով է որ արգելի, նա միայն նախագիծ ներկայացնող է: Նրանք ևս մեզ քննարկման են հրավիրել, որտեղից ևս մի շարք բաներ պարզ կլիներ: Մենք մեր դիրքորոշումները ներկայացրել ենք նախարարությանը, սակայն նրանք որևէ զիջումների չեն ուզում գնալ: Մենք ո′չ քանդող ենք, ո′չ նարկաման ենք, ո′չ հանցագործ ենք, մենք բիզնես ենք ուզում անել, կա առաջարկ, կա պահանջարկ»:

Ալեքսանդր Իսկանդարյանի խոսքով իր՝  թե′ Օպերայի սրճարանում և թե′ «Հուկա Բոսս»-ում մեծամասամբ զբոսաշրջիկներն են լինում, և նրա պնդմամբ Առողջապահության ու Երևանի քաղաքապետարանի որոշումների հետևանքով մեծ հարված է հասցվում տուրիզմին:

Արմինե ՄԻՔԱՅԵԼՅԱՆ