Էստակադա կառուցելը սխալ է. քննադատություն Մարությանի ու Մեշչյանի նախաձեռնությանը

Երևանի քաղաքապետարանը Ասիական զարգացման բանկի հետ ակտիվ բանակցություններ է վարում Հայրենիք կինոթատրոնի հարևանությամբ ճանապարհային նոր հանգույցներ կառուցելու նպատակով, որը հնարավորություն կտա զգալիորեն բեռնաթափել մայրաքաղաքի այդ հատվածների երթևեկությունն ու հնարավորինս խուսափել խցանումներից։

ԼՈւՐԵՐ․com—ի հետ զրույցում ճարտարապետ Գուրգեն Մուշեղյանն ասաց, որ Արշակունյաց պողոտա-Նժդեհի փողոցի խաչմերուկում տրանսպորտային հոսքերի բեռնաթափման նպատակով հանգույցի կառուցման համար իր մշակած նախագիծը 4 անգամ քննարկվել է Երևանի քաղաքապետին կից քաղաքաշինության խորհրդում, միաձայն ընդունվել է, սակայն, այդպես էլ մնացել է թղթի վրա․ «Հաշվի առնելով տեղանքի ճարտարապետությունը` ես առաջարկություն ներկայացրի, որ արվի ինքնակառավարվող համակարգ, անընդհատ երթևեկություն ապահովող ճանապարհային հանգույց՝ շրջադարձերի հնարավորությամբ: Եթե քաղաքապետարանը պետք է անդրադառնա հանգույցի կառուցման ծրագրին, մեկ անգամ էլ թող իմ նախագիծը դնեն քննարկման: Այնինչ, այսօր խոսում են վերգետնյա և ստորգետնյա անցումներով մի նախագծի մասին»,- նշեց Մուշեղյանը: 

Նրա խոսքով՝ խնդիրն այն չէ, որ դա իր նախագիծն է. «Սա տրանսպորտային հոսքերի բեռնաթափման նպատակով հանգույցի կառուցման օպտիմալ տարբերակն է, որպեսզի մարդիկ անընդհատ վերուվար չանեն: Առաջնահերթը մարդու խնդիրն է․ մարդկանց իջեցնում են կամ գետնի տակ, կամ 6 մետր բարձրացնում են վերև։ Մարդիկ ի վիճակի չեն ֆիզիկապես դա կատարելու, ստիպված` փողոցն են անցնում. կամ` պետք է լուսային կառավարման համակարգ դրվի, որ մարդիկ կարողանան անցնել փողոցը։ Այս բաները հաշվի չեն առնվում»,- ասաց նա։ 

Մուշեղյանի կարծիքով՝ Հայրենիքի հատվածում էստակադա կառուցելը սխալ է․ «Այնտեղ հնարավորություն չկա էստակադա անելու, ուրեմն, պետք է 250 մետրանոց թունել կառուցել։ Նաև էստակադան կփչացնի հրապարակի ամբողջ տեսքը, կաղավաղվի պատմական միջավայրը։ 

Գուցե ասեն՝ ինչու է կառուցվել Բարեկամության մետրոյի էստակադան։ Սակայն ասեմ, որ նրա տնտեսությունն ավելի վաղ է կառուցվել, Մետրոն կառուցելիս արվել են էստակադայի հենասյուները և մնում էր միայն դրա վրա դնելը։ Այսինքն` հարկավոր չէր դրա տակի տնտեսությունը քանդել։ Հայրենիքի դեպքում հարկավոր է ստեղծել մի մեխանիզմ, որ ծայրից ծայր ինքնակառավարման իրավիճակում լինի, այսինքն` բոլոր տեղերում արագությունները նույնը լինեն»,- նշեց ճարտարապետը։ 

Հաջորդ նախագիծը վերաբերում է մետրոյին։ Երևանի քաղաքապետարանը մտադիր է սկսել Երևանի մետրոպոլիտենի նոր կայարանների կառուցման ծրագիր։ Մուշեղյանը նկատեց՝ Երևանի համար մետրոն անհրաժեշտություն է և առաջինը նախատեսվում է կառուցել Աջափնյակի մետրոն, որպեսզի քաղաքը կապվի Աջափնյակի հետ։

Հարցին՝ խոսակցություններ կային, որ Հալաբյանի փողոցը մետրոյի համար սողանքային է, Մուշեղյանը պատասխանեց․ «Խոսակցությունները վերաբերում էին բնակելի շենք կառուցելուն, քանի որ եթե այն նստեր` մետրոյի ուղիները կարող էին վնասել։ Աջափնյակը կտրված է քաղաքից, կապը` Կիևյան կամուրջն է։ Այն կլուծի տրանսպորտային խնդիրն ու անվտանգության հարցը»,- նշեց Գուրգեն Մուշեղյանը։