«Լուսավոր Հայաստան»-ի պատգամավորի հարցը Նիկոլ Փաշինյանին առյուծի անեկդոտը հիշեցրեց (տեսանյութ)

«Լուսավոր Հայաստան» խմբակցության անդամ Արկադի Խաչատրյանը խորհրդարանում հարցուպատասխանի ժամանակ վարչապետից հետաքրքվեց, որ եթե կառավարությունն առանցքային մոտեցում ունի ծրագրերի նկատմամբ, ինչո՞ւ չափելի ցուցանիշներ չկան ծրագրում: Նա հարցրել է նաև, որ եթե որևէ նախարարություն այսպիսի ծրագիր ներկայացնի կառավարությանը, այն կընդունվի՞, թե՞ ոչ:

«Ես ուզում եմ շատ կոնկրետ մի հարցի պատասխան ստանալ՝ երբ որ մենք ասում ենք 2023 թվականին Հայաստանում ծայրահեղ աղքատություն չպետք է լինի, դա չափելի՞ է, թե՞ չափելի չէ: Շատ կոնկրետ ցուցանիշ է, ավելի կոնկրետ չի լինում՝ պետք է ծայրահեղ աղքատություն չլինի: Հիմա, եթե գրենք, որ աղքատությունը պետք է 7 տոկոսով կրճատվի, ձեր խմբակցությունն ի՞նչ էր անելու՝ ասելու էր կառավարությունն ասել է 7 տոկոս, բայց 5 տոկոսո՞վ է կրճատել, շատ վատ է, անմիջապես թող հրաժարական տա», – ասել է Փաշինյանը:

ՀՀ վարչապետը նշեց, որ «Լուսավոր Հայաստան» խմբակցությունից որոշ հարցեր և ելույթներ լսելիս առյուծի անեկդոտն է հիշում.

«Ձեր կուսակցության պատգամավորների հարցերը ինձ առյուծի անեկդոտն են հիշեցնում:

Ասում է, որ անապատում առյուծը հետևիցդ ընկած լինի, ի՞նչ կանես. ասում է` ծառը կբարձրանամ, հետո ասում է` ծառ չկա, ասում է` սարը կբարձրանամ, ասում է` չէ, սար չկա, ասում է` չհասկացա՝ դու իմ կողմից ե՞ս, թե՞ առյուծի, հիմա ձեր ուզածն ի՞նչ է, որ էդ փոփոխությունը լինի՞, թե՞ որ չլինի:

Ձեր հարցերի կոնտեքստում այն եմ զգում, որ դուք վախում եք ոչ թե  նրանից, որ այդ ծրագիրը չի իրականանա, այլ՝ որ կիրականանա: Եթե դրանից եք վախում՝ ճիշտ եք անում»,-ասել է Փաշինյանը

Մանրամասները՝ տեսանյութում: