Ի վերջո, ո՞ր պաշտոնյային է զանգահարել Նարեկ Սարգսյանը

Ըստ մամուլի հրապարակումների` Սերժ Սարգսյանի եղբոր` Ալեքսանդր Սարգսյանի որդին՝ Նարեկ Սարգսյանը, որն ԱԱԾ-ում հարուցված քրեական գործի շրջանակներում հետախուզման մեջ էր և հայտնաբերվել էր Պրահայում Ֆրանկլին Գոնսալես անվամբ օրերս զանգահարել է Հայաստանի իրավապահ համակարգի բարձրաստիճան պաշտոնյաներից մեկին, ներկայացել ու հայհոյախառն արտահայտություններ հնչեցրել. «Դու ո՞վ եղար, որ ինձ փնտրես, ինձ հետախուզես ու մի հատ էլ բռնել տաս, մոռացե՞լ ես, թե դու ով ես… Գլուխս եք կորցրել, մեկ է` չեմ գալու, դուք ինչ էլ անեք, չեք կարանալու ինձ բերել ստեղից…»,- ասել է նա:

ԼՈւՐԵՐ․com-ը իրավապահ մարմիններից փորձեց պարզել, թե ո՞ւմ է ի վերջո զանգահարել Ֆրանկլին Գոնսալեսը։ Մեզ հետ զրույցում Գլխավոր դատախազի խորհրդական Գոռ Աբրահամյանը ոչ հերքեց, ոչ էլ հաստատեց տարածված լուրերը․ «Ես չեմ կարող հերքել կամ հաստատել որևէ այնպիսի տեղեկատվություն, որտեղ որևէ կոնկրետ տվյալ ներկայացված չէ»,- ասաց նա:

Հատուկ քննչական ծառայությունից ու Քննչական ծառայությունից չմեկնաբանեցին, քանի որ գործն իրենց վարույթում չէ։ Ոստիկանությունից էլ փոխանցեցին, որ չեն կարող բոլորին զանգել և հարցնել, թե ո՞ւմ է զանգահարել Նարեկ Սարգսյանը՝ ուղղորդելով, որ այսօր դրան անդրադարձել է ԱԱԾ տնօրենը։ 

Կառավարության այսօրվա նիստից հետո լրագրողների հետ զրույցում անդրադառնալով հարցին՝ արդյոք տեղյա՞կ է, թե ում է զանգահարել Նարեկ Սարգսյանը, հնարավո՞ր է հենց իրեն է զանգահարել, ԱԱԾ տնօրեն Արթուր Վանեցյանն ասել է․ «Ես նման տեղեկություն չունեմ։ Ես ձեզ հավաստիացնում եմ՝ ինձ ոչ ոք չի կարող զանգել և նման տոնով խոսել»,- ասել է նա՝ նշելով, որ արտահանձնում այնքան էլ հեշտ գործընթաց չէ և  երկարատև ժամանակ է պահանջում։ 

Հիշեցնենք, որ 2018թ.-ի հունիսի 26-ին ԱԱԾ-ն խուզարկություն է իրականացրել Սարգսյաններին պատկանող տարածքներում։ Հայաստանի իրավապահները Նարեկ Սարգսյանին մեղադրանք են ներկայացրել նրա բնակարանում ապօրինի զենք, ռազմամթերք, պայթուցիկ նյութեր պահելու, փոխադրելու, թմրանյութ կրելու համար։

Բացի այդ, ԱԱԾ հաղորդագրության համաձայն՝ դեռևս 2013-ին Նարեկ Սարգսյանը, չարաշահելով նկարիչ Մարտիրոս Սարյանի ժառանգներից մեկի վստահությունը, նրանից վերցրել է նկարչի 14 գծանկարները և հրաժարվել վերադարձնել։ Նկարները հայտնաբերվել էին նրա բնակարանում։

Արդյունքում, 2018 թվականի դեկտեմբերի 6-ին հետախուզման մեջ գտնվող Նարեկ Սարգսյանին հայտնաբերել և ձերբակալել էին Պրահայում, որը ներկայացրել է Գվատեմալայի քաղաքացի` Ֆրանկլին Գոնսալեսի անունով: Հունվար 4-ին ՀՀ գլխավոր դատախազությունը հայտնել էր` նրա արտահանձնման թղթերն ուղարկել են Պրահա, իսկ այնտեղի ղեկավարությունը աշխատանքներ է տանում փաստաթղթերի ուսումնասիրման ուղղությամբ: 

Սոնա Հարությունյան