«Շշի Մելոյի» որդու և ևս 8 անձի չկալանավորելու որոշումը դատախազությունը բողոքարկել է

Աբովյանի «Պարտեզ» ռեստորանային համալիրի մոտ տեղի ունեցած զինված միջադեպի գործով անցնող 9 մեղադրյալի կալանավորման միջնորդությունները մերժելու վերաբերյալ Առաջին ատյանի դատարանի որոշումները Գլխավոր դատախազությունը բողոքարկել է: Այս մասին ԼՈւՐԵՐ.com-ի հետ զրույցում ասաց Գլխավոր դատախազության հանրային կապերի բաժնի պետ Արևիկ Խաչատրյանը:

Նշենք, որ այս գործով մեղադրյալներից մեկն էլ ԱԺ նախկին պատգամավոր, «Շշի Մելո» մականվամբ հայտնի  Մելիք Մանուկյանի որդին է՝ 24-ամյա Շանթ Մանուկյանը։ Նա ձերբակալվել էր և մեղադրվում էր խուլիգանություն կատարելու մեջ: Փետրվարի 2-ին դատարանը մերժել էր զինված միջադեպի մասնակիցներից Շանթ Մանուկյանի նկատմամբ կալանքը որպես խափանման միջոց կիրառելու վերաբերյալ միջնորդությունը:

Ավելի վաղ հայտնել ենք, որ հունվարի 29-ին՝ ժամը 01.30-ի սահմաններում, ոստիկանություն ահազանգ է ստացվել, որ կրակոցներ են հնչել Կոտայքի մարզում, կան վիրավորներ: Պարզվել է, որ նշված երիտասարդները հրազենային վնասվածքները ստացել են նույն միջադեպի ժամանակ՝ «Պարտեզ» ռեստորանային համալիրի մոտ։

Կրակոցների հետևանքով մահացել է Արտաշես Գևորգյանը, իսկ 21-ամյա Ջիվան Հարությունյանը՝ միջադեպից օրեր անց՝ հիվանդանոցում:

Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 6-րդ, 7-րդ, 10-րդ կետերի (մի խումբ անձանց կողմից խուլիգանական դրդումներով շատերի կյանքի համար վտանգավոր եղանակով սպանությունը) 34-104-րդ հոդվածի 2-րդ մասի 1-ին, 6-րդ, 7-րդ, 10-րդ կետերի (Մի խումբ անձանց կողմից խուլիգանական դրդումներով շատերի կյանքի համար վտանգավոր եղանակով երկու կամ ավելի անձանց սպանության փորձը), 235-րդ հոդվածի 1-ին մասի(Ապօրինի կերպով հրազեն ձեռք բերելը, կրելը) և 258-րդ հոդվածի 4-րդ մասի (խուլիգանությունը, որը զուգորդվել է անձի առողջությանը միջին ծանրության վնաս պատճառելով) հատկանիշներով։