«Էս ամեն ինչը շատ հեշտ չի մարսվելու». խմբագիրները դատարան կդիմեն (տեսանյութ)

«Արդյո՞ք այս շենքը այդպիսի գայթակղիչ բիզնես ձեռնարկ է, բիզնես շենք է, որը կարող է հետաքրքրել տարբեր կառույցների, տարբեր վարձակալների, որոնք պատրաստ են գալ և քաղաքապետարանի սահմանած գներով, իսկ դրանք բավականին բարձր գներ են, վաձակալել այս շենքը»,-այս մասին այսօր հրավիրված մամուլի ասուլիսի ժամանակ ասաց «Հրապարակ» թերթի գլխավոր խմբագիր Արմինե Օհանյանը։

«Քաղաքապետը արդյունավետությանն ու տնտեսվարմանը այլ կերպ պետք է վերաբերվի։ Պետք է ինչ-որ բան ստեղծեն, ոչ թե քանդեն, ավիրեն, եթե իրենց հույսը այն է, որ իրենց ունեցած այս խղճուկ տարածքները կվաճառեն և ինչ-որ հարցեր կլուծեն՝ չի ստացվելու, փոխարենը տպավորություն է ստեղծվելու, որ այս իշխանությունը, ի տարբերություն մեր կողմից մերժված, մեր կողմից ատելի հանրապետականների, շատ ավելի վատ վերաբերմունք ունի, շատ ավելի քիչ է գնահատում մամուլը և ազատ խոսքը, քան նախորդ իշխանությունները»,-ասաց նա։

«Եթե խոսում ենք օպտիմալացման մասին, վստահ ենք չէ՞, որ առնվազն երկու տարի մենք այս տարածքը պետք է զբաղեցնենք։Հիմա մեր մտահոգ կամ դուխով քաղաքապետը մտածում է, որ ավելի արդյունավետ պետք է օգտագործվի, սակայն այլ դատարկ տարածքներ կան, որ կարող էր դա օգտագործել։ Նախկին իշխանություններից որևէ մեկի մտքով չի անցել, որ տարածքը վերցնեն։ Մեզ հետ ուլտիմատումով են խոսում, հնգօրյա ժամկետ են տալիս, մենք ինչպե՞ս պետք է այդ ամենը կազմակերպենք, մենք դատական կարգով էս ամեն ինչը վիճարկելու ենք, և ես խոստանում եմ, որ էս ամեն ինչը շատ հեշտ չի մարսվելու»,-այս մասին ուսուլիսի ընթացքում հայտարարեց Hayeli.am կայքի հիմնադիր Անժելա Թովմասյանը։

Մանրամասները՝ 24news.am-ի տեսանյութում։