Գլենդելի հայ համայնքը կրկին բողոքի ցույց է արել «Հարսնաքարի» առնչությամբ

Ինչպես տեղեկացնում է «Asbarez»-ը Հուլիսի 13-ին Լոս Անջելեսի Հայաստանի Հանրապետության գլխավոր հյուպատոսության դիմաց կրկին մարդիկ են հավաքվել՝ ի նշան Հայաստանում ռազմական բժիշկ Վահե Ավետյանի սպանության դեմ բողոքի: 

Մասնակիցներից մեկը եղել է Ավետյանի ազգականը: Նա կոչ է արել, որպեսզի երկրում օրենքներն իրագործվեն, տարրական արդարություն կիրառվի իր ազգականին սպանողների նկատմամբ:

Գրեթե մեկ ժաման տևած բողոքը գրավել է «Glendale News Press»-ի լուսանկարչի և Գլենդելի ոստիկանության ուշադրությունը:

Հյուպատոսության անձնակազմը ցուցարարներից միայն մեկ հոգու է ներս թողել, որն էլ պահանջներ է փոխանցել այն մասին, որպեսզի.

1. Հայաստանի ԱԺ-ի արտակարգ նիստ հրավիրվի,

2. Գլխավոր դատախազը մեղադրանք ներկայացնի Ռուբեն Հայրապետյանին՝ որպես Ավետյանի սպանության գործում մեղսակից,

3. Հայրապետյանն ազատվի ԱԺ-ից դրա կանոնակարգը խախտելու համար, որը պատգամավորներին արգելում է առևտրային գործունեություն ծավալել,

4. Հայրապետյանի թույլ տված իրավախախտման և Ավետյանի սպանության հանգամանքների անկողմնակալ քննություն անցկացվի,

5. Հայրապետյանը հեռացվի Հայաստանի Ֆուտբոլի ֆեդերացիայի նախագահի պաշտոնից:

Հաջորդ ցույցերը տեղի կունենան կրկին նույն տարածքում՝ կիրակի օրերին, տեղական ժամանակով ժամը 13:00-ին, իսկ առանձնահատուկ ցույց է նախատեսվում Ավետյանի մահվան 40-րդ օրը: