Շտապօգնության աշխատակիցները դիմել են «վերևներին». տնօրենն անտեղյակ է

Երևանի քաղաքապետարանի «Շտապ բուժգնության» թվով 375 աշխատակից դիմում է գրել ՀՀ վարչապետին, առողջապահության նախարարին և Երևանի քաղաքապետին: Նրանք ցանկանում են պատկան մարմինների ուշադրությունը սևեռել ներկայում ՇԲՕ ոլորտում տիրող իրավիճակի վրա. «Չնայած բազմիցս հնչող խոստումներին՝ առողջապահության ՇԲՕ ոլորտը շարունակում է մնալ անտեսված: Պահանջում ենք ՇԲՕ սպասարկող բուժանձնակազմին բժշկական ապահովագրության տրամադրում, աշխատանքի ծավալին համապատասխան աշխատավարձի սահմանում, նոր բրիգադաների ավելացման հաշվին ՇԲՕ գերծանրաբեռնված համակարգի բեռնաթափում, բժշկական համազգեստի ֆինանսավորում կամ հատկացում, հանգստի արժանապատիվ պայմանների ապահովում՝ ներառյալ վերանորոգված հանգստի սենյակ, սանհանգույց, խոհանոց խնդիրների անհապաղ կարգավորումը»,- դիմումում գրել է ՇԲՕ բարեփոխումների նախաձեռնող խումբը: 

Պարզվում է՝ աշխատակիցների նախաձեռնությունից տնօրենն անտեղյակ էր: ԼՈՒՐԵՐ.com-ի հետ զրույցում Շտապօգնության կենտրոնի տնօրեն Թագուհի Ստեփանյանն ասաց՝ այդ մասին մեզանից է լսում. «Այնպես չէ, որ նորություն է, քանի որ դրա հետ կապված հանդիպումներ, ժողովներ ենք արել: Այնպես էլ չէ, որ աշխատակիցների բարձրացրած հարցերի հետ մենք համաձայն չենք եղել, չենք արձանագրել կամ չենք խոսել: Մեր վերադասներն էլ հանդիպել, ասել են, որ բոլոր հարցերին լուծում է տրվելու: Հիմա, թե ինչու են դիմել՝ չգիտեմ, ինձ էլ տեղյակ չեն պահել, մինչ այդ խոսակցություն չի եղել»,- նշեց նա: 

Դիտարկմանը՝ այս ընթացքում ի՞նչ քայլեր են ձեռնարկվել խնդիրներին լուծում տալու ուղղությամբ, Ստեփանյանն ասաց, թե քաղաքապետարանի կողմից ուսումնասիրվել են բարձրացված բոլոր հարցերը, սակայն դրանք մեկ օրվա լուծելու հարցեր չեն, որ միանգամից կատարեն: