«Սեքյուրիթի դրիմ»-ում գործադուլ է. աշխատակիցները 3 պահանջ ունեն

Առավոտից «Սեքյուրիթի դրիմ» ընկերության աշխատակիցները գործադուլ են հայտարարել, հավաքվել են ընկերության գլխավոր մուտքի դիմաց՝ արագաչափերի և տեսախցիկների վերահսկմամբ և տեղադրմամբ զբաղվող «Էլլիպս» և «Սեքյուրիթի դրիմ» ընկերության սեփականատերերից պահանջելով պարզաբանում, թե ինչու են անհիմն աշխատանքից հեռացնում  «Սեքյուրիթի դրիմ» ընկերության տնօրեն Արամ Ղլեչյանին։ 

ԼՈՒՐԵՐ․com-ի հետ զրույցում «Սեքյուրիթի դրիմ» ընկերության մամուլի քարտուղար Լիլիթ Նիկոյանն ասաց, որ բողոքի ակցիան չի դադարել․ «Ալեքսան և Գուրգեն Զաքարյանները տնօրենին ասել են, որ պետք է աշխատավարձերը ցածրացնեն կամ 30%-ով կրճատումներ անեն, մեր տնօրենը դեմ է եղել, որի համար աշխատանքից ազատել են»,- ասաց նա՝ նշելով, որ աշխատակիցները պատրաստ են մինչև վերջ գնալ։

Ընկերության մամուլի քարտուղարը նշեց՝ աշխատակիցները երեք պահանջ ունեն․ «Նրան պահանջում են, որպեսզի տնօրենին չհեռացնեն, կրճատումներ չլինեն, աշխատավարձը 10 %-ով բարձրացվի, քանի որ դրա հնարավորությունը կա։ Աշխատակիցները պահանջում են նաև, որ ընկերության հիմնադիրները վերանայեն որոշումը և Ղլեչյանին չազատեն աշխատանքից»,- նշեց Նիկոյանը։

Ի դեպ, քիչ առաջ Քննչական կոմիտեից հայտնեցին, որ «Սեքյուրիթի դրիմ»-ի տնօրեն Արամ Ղլեչյանը ցուցմունք է տվել ընկերության հիմնադիրների դեմ այն մասին, որ Ճանապարհային ոստիկանության կողմից ամսական ստացված 70 միլիոն ՀՀ դրամից 43 միլիոն դրամը յուրացվել է ընկերության հիմնադիրների կողմից:

Նշենք, որ «Էլլիպս»-ը զբաղվում է անվտանգության սարքերի տեղադրմամբ, իսկ անվտանգության համակարգերի շահագործումը՝ խախտումների հայտնաբերում, տեսանյութերի առանձնացում, մշակում, Ճանապարհային ոստիկանության հետ համատեղ իրականացնում է «Սեքյուրիթի դրիմ»-ը:

Ըստ որոշ տեղեկությունների՝ այս ընկերությունը կապվում է Սերժ Սարգսյանի եղբոր՝ Ալեքսանդր (Սաշիկ) Սարգսյանի անվան հետ:

Սոնա Հարությունյան