Պլեխանովյան շաբաթը Երևանում․ բրոնզեդարյան դամբարանադաշտից մինչև թվային մարդը (Homo Digital)

Հայ հանրությանն անկասկած ծանոթ է 20-րդ դարի խոշոր մտածող՝ մարքսիստ, փիլիսոփա Գեորգի Վալենտինովիչ Պլեխանովի անունը։ Թեև ցավով պետք է նկատենք, որ նրա գիտական ծանրակշիռ ժառանգությունը ներկայումս հավուր պատշաճի թե՜ ՀՀ, թե՜ ՌԴ կրթական ծրագրերում ներկայացված չէ, սակայն Պլեխանովի անունը կրող Բարձրագույն ուսումնական հաստատությունը՝ Ռուսաստանի տնտեսագիտական համալսարանը քաջածանոթ է ինչպես ավագ սերնդի ներկայացուցիչներին, այնպես էլ երիտասարդությանը։ Այն հիմնադրվել է դեռևս 1907 թվականին և ներկայումս էլ պահպանել առաջին տնտեսագիտական համալսարանի պատվավոր կոչումը։  

Եվ այսպես, Պլեխանովի անվան Ռուսական համալսարանի Երևանի մասնաճյուղում ԲՈՒՀ-ի 112-ամյակի կապակցությամբ ս/թ փետրվարի 19-25-ն ընթացավ «ՊԼԵԽԱՆՈՎՅԱՆ ՇԱԲԱԹԸ ԵՐԵՎԱՆՈՒՄ» միջոցառումների շարքը։ Մեկնարկը դրվեց տնտեսագիտական քննարկումներով, որի թեմատիկ առանցքն էր վերջերս ընդունված ՀՀ կառավարության ծրագիրը (զեկուցող՝ Հրանտ Միքայելյան), դրան հաջորդեցին մարքեթինգային բաց դասը (մասնաճյուղի առաջատար մասնագետ Նինա Մեհրաբյան), Ամերիկյան ակադեմիայի ՑԻՍԿՈ (CISCO) ծրագրի շնորհանդեսը (Գայանե Գագյան), այնուհետև հնագետ Աշոտ Փիլիպոսյանի դասախոսությամբ մասնաճյուղի ուսանողները ծանոթացան Մեծամորի հնագիտական թանգարանի գանձերին ու բացառիկ ցուցանմուշներին, իսկ բլոքչեյն տեխնոլոգիաներին նվիրված ուսանողական համաժողովն էլ հանդիսավոր կերպով փակեց Պլեխանովյան շաբաթը։ 

Մեկ շաբաթ տևած միջոցառումների շրջանակներում ԲՈՒՀ-ի ուսանողներն ու հյուրերը թեմատիկ շրջայց կատարեցին բրոնզեդարյան դամբարաններից ու դրանցում հայտնաբերված կմախքներից մինչև թվային մարդն (digital homo) ու բլոքչեյն տեխնոլոգիաները։

ԼՈՒՐԵՐ․com-ի խմբագրական կոլեկտիվը շնորհավորում է Գ.Վ. Պլեխանովի անվան Ռուսական տնտեսագիտական համալսարանի 112-ամյակը և մաղթում Երևանի մասնաճյուղին բեղմնավոր գիտաուսումնական գործունեություն և հետագա զարգացում։