Դիմել ենք քաղաքապետարան, բայց չենք ստանում մեր հարցերի պատասխանները (տեսանյութ)

Սիլիկյան 3 հասցեում կառուցվում է 12 հարկանի շենք, որը հնարավորություն կտա վերաբնակեցնել վթարային շենքերի բնակինչներին: Շենքի հարակից՝ Վշտունի 1-ին նրբանցքի սեփական տների և բարձրահարկ շենքերի բնակիչները բողոքում են որոշման դեմ:

ԼՈՒՐԵՐ. com-ը փորձեց պարզել, թե ինչու են բողոքում բնակիչները,  ո՞րն է նրանց պահանջը: Նորակառույց շենքին հարակից սեփական տան բնակչուհի տիկին Սվետան ասաց․

«Մենք բողոքում ենք այս որոշման դեմ, որովհետև էս փոքր տարածքում 12 հարկանի  շենքի կառուցումը խանգարում է բնակիչներին: Առաջին հերթին մեր տների  վրա էլ արև չի ընկնելու: Հիմա եղանակը տաք է՝ ոչինչ, բայց ձմեռը փողոցի ձյունը չի հալվում: Քաղաքապետարանը ժամանակ է խնդրում պատասխանելու համար ու ձգձգում է»:

Բնակիչների համար կարևոր խնդիր է նաև շենքի և տների միջև հեռավորությունը (մոտավորպես 6 մետր): Այդ տարածքում մեքենաներ են կայանում, փողոցը բավական բանուկ է:

Վշտունի 1-ին նրբանցքի բնակչուհի Արեքնազ Քեշիշօղլյանն ասաց.

«Մենք դիմել ենք քաղաքապետարան, բայց չենք ստանում մեր հարցերի պատասխանները: Մեզ թույլ չտվեցին Մարությանի հետ հանդիպել։ Երեք հոգով գնացինք Մեսչյանի մոտ՝ ասաց՝ կմտածենք, ու պատասխան չկա: 7 ամսից ավել է՝ շինարարություն են անում: Նախկինում էստեղ 5 հարկանի հանրակացարան էր, քանդեցին: Հիմա առաջարկում ենք, որ գոնե 5 հարկ կառուցեն: Դրան էլի կհարմարվենք»:

Այս տարածքում խնդիր է նաև խաղահրապարակի բացակայությունը: Նախկինում երեխաները խաղացել են փողոցում, ասօր չկա նաև այդ հնարավորությունը:

«Մենք դժգոհում ենք նաև շինարարության պրոցեսից: Պանելները մեր գլխի վրայով են տանում ու ասում են  մի անհանգստացեք, անվտանգ է: Ո՞նց կարող է ապահով լինել, դեպք է, կարող է պատահել: Մեքենաներ են կանգնում փողոցում,  երեխեք են անցնում:

 Մենք հասկանում ենք, որ որոշումը նախկին քաղաքապետ Տարոն Մարգարյանն է ընդունել, բայց Մարությանը կարող է բան փոխել: Իրեն էլ հո մենք ենք ընտրել:

Առաջարկեցինք 5 հարկն էստեղ կառուցել, մյուս 5 հարկը Էրեբունիում, մեզ ասացին՝ Էրեբունիում օդը մաքուր չի: Էստեղ էլ իրենց շենքից դուրս են գալու մտնեն մեր տուն»,- հավելեց Արեքնազ Քեշիշօղլյանը:

Փողոցի բնակիչ Ռաֆիկ Եղիազարյանի  տանից շենքը հեռու է 2 մետր, շինարարության պատճառով նրա տան կոյուղու աշխատանքը խաթարվել է:

«Ես ծեր մարդ եմ, էս տարիքում չեմ կարա իմ երկիրը լքեմ: Եթե իմ երկիրը ինձ չի պահում, ո՞ր երկիրը կընդունի: Մեր պահանջը մի հատ ա, որ կառուցեն 5 հարկ ու վերջ»,-ասաց Եղիազարյանը:  

Մեր հարցին, թե ի՞նչ  են անելու, եթե իրենց պահանջները չբավարարվեն, բնակիչները պատասխանեցին՝  «Կփակենք փողոցը ու թույլ չենք տա, որ իրենց շինարարությունը շարունակեն»:

Մանրամասները՝ տեսանյութում։