Ազգային պատկերասրահի կորուստները եղել են մինչև 2012 թվականը. նախկին տնօրեն

Արդեն տեղեկացրել էինք, որ  ՀՀ գլխավոր դատախազության պահանջով իրականացված 2018-2019թթ. «Ցուցահանդեսային կենտրոն» ՊՈԱԿ-ի ֆոնդերում թանգարանային առարկաների առկայության ստուգման արդյունքում պարզվել է, որ բացակայում են 626 անուն մշակութային արժեքներ։ Այս հարցի շուրջ ԼՈՒՐԵՐ․com-ը զրուցել է «Ցուցահանդեսային կենտրոն» ՊՈԱԿ-ի նախկին տնօրեն Խաչատուր Աբրահամյանի հետ։ 

«Ես՝ որպես  գեղանկարիչ, շատ մտահոգված եմ մշակութային դաշտում տեղի ունեցող իրադարձություններով։ Բացի դա, 2012-2016 թվականներին աշխատել եմ որպես «Ցուցահանդեսային կենտրոն» ՊՈԱԿ-ի տնօրեն։ Մշակույթի նախարարի հրամանով հանձնաժողով է ստեղծվել, «Ցուցահանդեսային կենտրոն» ՊՈԱԿ-ի գույքագրում է արել, և այդ գույքագրումի հիման վրա մենք սկսել ենք աշխատել։ Եվ այդ տարիների ընթացքում ոչ մի բան չի կորել, այդ կորուստները եղել են մինչ այդ։ Բացի դա, իմ մտահոգությունը այնքան է եղել, որ մեր նախաձեռնությամբ փորձել ենք հետ բերել բացակա աշխատանքները  և եղել են դեպքեր, որ կարողացել ենք վերադարձնել որոշ բացակա գործեր։ Իմ ղեկավարման ընթացքում ՊՈԱԿ-ի ֆոնդը նաև համալրվել է։

2016-ից հետո «Ցուցահանդեսային կետրոն» ՊՈԱԿը լուծարվել է, միավորվել է Ազգային պատկերասրահի հետ և ամբողջ գույքը, բանալիները ես հանձնել եմ, և որպես պաշտոնյա իրավասու չեմ եղել շարունակել իմ աշխատանքը։ Այն, ինչ մենք ընդունել ենք, նույնը հանձնել ենք պատկերասրահին»,-ասաց Խաչատուր Աբրահամյանը։