Հույս ունեմ, որ Ադրբեջանի իմ գործընկերը չի դրժի պայմանավորվածությունը․ Նիկոլ Փաշինյան

«Կողմերը պայմանավորվել են պահպանել և ուժեղացնել հրադադարի ռեժիմը։ Սա մեր քաղաքական պայմանավորվածությունն է։ Եթե հանկարծ որևէ մեկը դրժի այդ պայմանավորվածությունը, դա չի նշանակում, թե մենք չենք պաշտպանվելու։ Հույս ունեմ, որ Ադրբեջանի իմ գործընկերը չի դրժի այդ պայմանավորվածությունը։ Ցավոք սրտի, Ադրբեջանը, ժամանակ առ ժամանակ, ուժի կիրառման սպառնալիքը բանակցային գործընթացում փորձում է օգտագործել, մենք ասում ենք, որ եթե շարունակեք օգտագործել, մենք էլ կօգտագործենք, արդյունքում ի՞նչ կստացվի, եկեք խախաղության օրակարգ ձևավորենք»,-այս մասին այօր ԱԺ «Իմ քայլը» խմբակցության հետ փակ հանդիպման ավարտից հետո լրագրողների հետ զրույցում հայտարարեց վարչապետ Փաշինյանը՝ պատասխանելով լրագրողների այն հարցին, թե արդյոք այս բանակցությունները տալիս են երաշխիք, որ Ադրբեջանը չի դիմի պատերազմի՝ հիշեցնելով քառօրյա պատերազմը, որից առաջ ՀՀ նախագահ Սերժ Սարգսյանը ևս պարբերաբար հանդիպումներ էր ունենում Ադրբեջանի նախագահ Իլհամ Ալիևի հետ։

Նիկոլ Փաշինյանը նշեց նաև, որ մարդասիրական քայլերի հետ կապված հույս ունի, որ մենք կկարողանանք երկուստեք երաշխավորել գյուղացիական աշխատանքների անվտանգությունը։ Վարչապետը հավաստիացրեց՝ մեր զորքերը որևէ քաղաքացիական անձի վրա չեն կրակի, առավել ևս, գյուղացիական աշխատանքներ իրականացնող։