Բարձրագույն դատական խորհրդում քննարկվել են էլեկտրոնային արդարադատության միասնական համակարգի հնարավորությունները

Բարձրագույն դատական խորհուրդն ընդունեց էլեկտրոնային արդարադատության ճանաչված գործիչ, ՌԴ էլեկտրոնային արդարադատության համահիմնադիր Ելենա Ավագյանին։ Հանդիպմանը ներկա էին նաև ՄԱԿ-ի Զարգացման ծրագրերի հայաստանյան գրասենյակի ներկայացուցիչներ, տեղեկատվական ոլորտի փորձագետներ։ Այս մասին տեղեկացրին Բարձրագույն դատական խորհրդի մամուլի և հասարակայնության հետ կապերի ծառայությունից։

«Բանախոսը ներկայացրեց հայաստանյան գործընկերների հետ համատեղ մշակված այն հիմնական 15 ուղղությունները, որոնք կարևոր են Հայաստանում էլեկտրոնային արդարադատության միասնական համակարգի մշակման և ներդրման համար:

Տարածաշրջանում էլեկտրոնային արդարադատությունն իրականություն է, որի շնորհիվ աշխարհի ցանկացած կետից հնարավոր է հետևել դատական գործընթացներին՝ հայցադիմումների մուտքագրումից մինչև դատական նիստերի օնլայն կազմակերպում։

Ներկաների համոզմամբ՝ էլեկտրոնային արդարադատությունը հնարավորություն կտա ավելի արդյունավետ և թափանցիկ դարձնել արդարադատության իրականացումը։

Բարձրագույն դատական խորհրդի նախագահ Գ․ Հարությունյանը Խորհրդի անունից շնորհակալություն հայտնեց Ելենա Ավագյանին հետաքրքիր ու բովանդակալից ներկայացման համար։ Նա նաև հավելեց, որ Խորհուրդն այսօր ակտիվ քայլեր է ձեռնարկում էլեկտրոնային արդարադատության միասնական համակարգի ներդրման ուղղությամբ, որի շնորհիվ հնարավոր կլինի տնտեսել տարեկան շուրջ 1 մլրդ դրամ:

Քննարկման ավարտին Խորհրդի նախագահը հույս հայտնեց, որ հաջորդ  հանդիպմանն առիթ կունենան ներկայացնելու արդեն հայաստանյան փորձը»,- նշված է հաղորդագրության մեջ: