Մենք անուղղակի կոֆե խմող աշխատակիցներ չենք պահելու. Հայկ Սարգսյան

Ինչպես արդեն տեղեկացրել էինք, վարչապետ Նիկոլ Փաշինյանը Ստրասբուրգում հանդիպել է հայ համայնքի հետ, որտեղ խոսել է հեղափոխությունից հետո Հայաստանում տեղի ունեցող զարգացումների մասին, մասնավորապես, նշելով․ «Մենք հիմա տնտեսական աճի ցուցանիշի մեջ ենք, Հայաստանում 10 ամսում աշխատատեղերի թիվն ավելացել է 51 հազարով։ Դա աշխատաշուկայի ընդհանուր 10%-ն է»։

Վարչապետի այս հայտարարությունը Հայաստանում քննարկումների արժանացավ. մասնավորապես սոցհարթակում քաղաքացիները փորձում էին հասկանալ՝ ինչ աշխատատեղերի մասին է խոսում վարչապետը։

ԼՈւՐԵՐ․com -ի հետ զրույցում «Իմ քայլը» խմբակցության պատգամավոր Հայկ Սարգսյանն ասաց, որ այդ թիվը ինքը խնդրել է Տնտեսական զարգացման և ներդրումների նախարարությունից․ «Երբ նախարարությունը այդ մասին ինձ տեղեկություն տրամադրի, ես ֆեյսբուքի իմ էջում անպայման կհրապարակեմ դա։ Մեր կառավարությունը սիրում է թվեր ներկայացնել, և մեր բոլոր ասածները թվերով հիմնավորվում են, և վարչապետի հայտարարությունը նույնպես թվերով կհիմնավորվի»,-ասաց Հայկ Սարգսյանը։

ԼՈւՐԵՐ․com-ի դիտարկմանը, թե սոցցանցերում քննարկումների ընթացքում հնչում են մտքեր այն մասին, որ հաճախ նկատվում են կրճատումներ, օպտիմալացումներ, բայց աշխատատեղեր այդպես էլ չեն նկատվում՝ այն էլ այդքան մեծ թվով, պատգամավորն արձագանքեց․ «Մենք ասել ենք, որ պետական համակագը աշխատատեղ չի, պետական համակարգի աշխատողները վարձատրվում են մեր քաղաքացիների՝ իրենց վճարած հարկերով։ Մենք անուղղակի կոֆե խմող աշխատակիցներ չենք պահելու, որպեսզի բեռ չլինեն մեր հարկատուների վրա։ Երբ հարկատուն հարկ է վճարում, պետք է իմանա, որ հարկը գնալու թիրախային, ուժեղացնելու է իր պաշտպանությունը, խթանելու է իր տնտեսության զարգացմանը, նպաստելու է առողջապահական ոլորտի զարգացմանը, ճանապարհների զարգացմանը։ Օպտիմալացման պատճառն այն է, որ մարդիկ, ովքեր որևէ ծառայություն չեն մատուցում պետությանը՝ չստանան աշխատավարձեր»,- եզրափակեց Հայկ Սարգսյանը։

Սիլվի ՏԻԳՐԱՆՅԱՆ