Հ1-ը եթեր չի տրամադրել իր դեմ բողոքողներին՝ եթերային ժամանակի սղության պատճառով

«Հայկական արժեքների պաշտպանության կամք» ՀԿ-ն այսօր ակցիա իրականացրեց ՀՀ Հեռուստառադիոընկերության խորհրդի դիմաց: Բանն այն է, որ Հանրային հեռուստաընկերության եթերով ապրիլի 5-ին ցուցադրվել է «Իրավունքի կողմ» ՀԿ-ի նախագահ, տրանսգենդեր Լիլիթ Մարտիրոսյանի ելույթը՝ ԱԺ ամբիոնից, իսկ ակցիայի մասնակիցները՝ տրանսգենդերին եթեր տրամադրելը համարում են քարոզչություն:

Ապա ակցիայի կազմակերպիչներից Վահագն Չախալյանը բողոքեց, թե Հ1-ը միակողմանի է լուսաբանում և իրենց եթեր չի տրամադրում:

ԼՈՒՐԵՐ.com-ի հարցին, թե արդյոք Հանրային հեռուստաընկերությունը լուսաբանելո՞ւ է այսօրվա բողոքի ակցիան, պատասխանեցին, որ Հանրայինի լրագրողը ներկա է եղել ակցիային, նկարահանել է ամբողջ ընթացքը և հարցեր ուղղել ակցիայի մասնակիցներին, սակայն օրվա լրահոսի հագեցվածության և եթերային ժամանակի սղության հետևանքով նշված ռեպորտաժը եթեր չի հեռարձակվել:

Հանրային հեռուստաընկերության հասարակայնության հետ կապերի բաժնից, մեր հարցմանն ի պատասխան, ասացին, որ Հանրայինը, առաջնորդվելով ՀՀ սահմանադրության 42-րդ հոդվածով և «Հեռուստատեսության և ռադիոյի մասին» ՀՀ օրենքի 26-րդ հոդվածով, ապրիլի 8-ին հեռարձակել է ռեպորտաժ, որտեղ անդրադարձ է կատարվել հասարակական առավել հնչեղություն ստացած դեպքին:

«Նշված ռեպորտաժը, հիմքում ունենալով անձանց տեղեկացված լինելու սահմանադրական սկզբունքը և դրան համապատասխան Հանրային հեռուստաըկերության պարտականությունը՝ ղեկավարվել օբյեկտիվության, անկողմնակալության սկզբունքներով, ապահովել է Ազգային ժողովի բակում և Ազգային ժողովի նիստին տեղի ունեցած քննարկումների մասին տեղեկությունների ներկայացումը: Հարկ է նշել, որ ռեպորտաժը անդրադառնում է արդեն իսկ կատարված դեպքի՝ հասարակության արձագանքին, դեպք, որը հասարակական բուռն արձագանք էր ստացել սոցիալական ցանցերում և այլ լրատվական միջոցների լայն քննարկումների արդյունքում: Միաժամանակ հարկ է նշել, որ Ազգային ժողովի բակում և Ազգային ժողովի նիստին տեղի ունեցած իրադարձությունների անդրադարձը չի համարվում և որևէ կերպ չի կարող համարվել նախորդող դեպքերի կամ գաղափարների ուղղակի կամ անուղղակի տարածում»,- ասված էր Հասարակայնության հետ կապերի բաժնի պատասխանում:

Հիշեցնենք, որ ապրիլի 5-ին Ազգային ժողովում հանրային լսումների ժամանակ ելույթ էր ունեցել «Իրավունքի կողմ» ՀԿ նախագահ, տրանսգենդեր Լիլիթ Մարտիրոսյանը: