Պորոշենկոն Զելենսկու հետ բանավեճի պայման է առաջադրել

Ուկրաինայի նախագահ Պետրո Պորոշենկոն պատրաստ է քննարկել ապրիլի 19-ին «Օլիմպիյսկի» ազգային մարզադաշտում նախագահի թեկնածու  Վոլոդիմիր Զելենսկու հետ բանավեճի անցկացման հնարավորությունը՝ պայմանով, որ դրա ժամը չի համընկնի երկրի Հանրային հեռուստատեսությամբ բանավեճի անցկացման պաշտոնական ժամի հետ, հայտարարել է գործող նախագահի ընտրական շտաբի ներկայացուցիչ Օլեգ Մեդվեդևը։ Այս մասին տեղեկացնում է «ՌԻԱ Նովոստի»-ն:

Ըստ նրա՝ եթե բանավեճն անցկացվի այն ժամին, որը չի հակասում օրենսդրությանը, ապա կարելի է քննարկել մասնակցության հնարավորությունը։ «Սակայն, քանի որ այն պլանավորված է այն ժամին, երբ Պորոշենկոն, ըստ օրենքի, պետք է լինի Հանրային հեռուստատեսությունում, նա, որպես օրինավոր քաղաքացի, կգնա Հանրային հեռուստատեսություն»,- ասել է Մեդվեդևը։

Ավելի վաղ Պորոշենկոն հայտարարել է, որ իր հակառակորդին բանավեճի համար սպասում է ապրիլի 14-ին, Կիևի «Օլիմպիյսկի» մարզադաշտում։ Նա հրավիրել էր նաև հանդիսատեսին և հեռուստաալիքներին։ Զելենսկին, իր հերթին, հայտարարել էր, որ Պորոշենկոյի հետ բանավեճը մտադիր է անցկացնել ապրիլի 19-ին։ Հենց նույն օրը, նախագահի ընտրությունների մասին օրենքի համաձայն, պլանավորված է թեկնածուների բանվեճը Հանրային հեռուստատեսությունում։ Զելենսկու ընտրական շտաբը հնարավոր է համարել թեկնածուների բանավեճի՝ հեռուստակամրջի ռեժիմով անցկացումը Հանրային հեռուստատեսության ստուդիայից և «Օլիմպիյսկի» մարզադաշտից, սակայն պետական հեռուստաալիքը հայտարարել է, որ հեռուստակամուրջն արգելված է բանավեճի կանոններով։ Առայժմ կողմերին չի հաջողվել պայմանավորվել բանավեճի անցկացման տեղի և ժամանակի մասին։