Երևանում գործող «18+» ակումբում կրակոց արձակած 30-ամյա տղամարդը չկարողացավ թաքնվել ոստիկաններից

SHAMSHYAN.com-ի տեղեկություններով, այսօր՝ ապրիլի 14-ին, ոստիկանության Կենտրոնական բաժնի քրեական հետախուզության բաժանմունքի ծառայողները՝ բաժանմունքի պետ Վարոսյանի գլխավորությամբ, խուլիգանություն կատարելու կասկածանքով ոստիկանության Կենտրոնական բաժին են բերման ենթարկել Երևան քաղաքի Էրեբունի վարչական շրջանի բնակիչ, 30-ամյա Յուրիկ Գրիգորյանին:

Պարզվել է, որ վերջինս 2018թ. դեկտեմբերին Երևան քաղաքի Տերյան փողոցի 105/1 հասցեում գործող «18+» ակումբում բացահայտ անհարգալից վերաբերմունք է դրսևորել այնտեղ գտնվող հաճախորդների նկատմամբ:

Պարզվել է, որ նա այդ ժամանակ իր մոտ եղած ատրճանակով կրակոց է արձակել ակումբի ներսում՝ խախտելով բնականոն աշխատանքը:

Փաստի առթիվ ոստիկանության Կենտրոնական բաժնի հետաքննչական բաժանմունքում հետաքննություն է սկսվել:

Յու. Գրիգորյանը ստորագրությամբ բաց է թողնվել: