Քննարկվում է կառավարության կառուցվածքի փոփոխության հարցը

Ազգային ժողովի պետաիրավական հարցերի մշտական հանձաժողովի ապրիլի 15-ի նիստում քննարկվում է «Կառավարության կառուցվածքի և գործունեության մասին» Հայաստանի Հանրապետության օրենքում փոփոխություններ և լրացումներ կատարելու մասին» օրենքի նախագիծը։ ՀՀ արդարադատության նախարար Արտակ Զեյնալյանը հայտարարեց, որ դրա նպատակն է ֆունկցիոնալ իմաստով ունենալ կառավարության առավել օպտիմալ կառուցվածք, ինչը հնարավորություն կտա լավագույնս ապահովել կառավարության արդյունավետ գործունեությունը։

Առաջարկվող փոփոխություններով՝ Կառավարությունը կազմված է լինելու վարչապետից, երկու փոխվարչապետներից և 12 նախարարից: Օրենքների նախագծերի փաթեթով նախատեսվում է կրճատել փոխվարչապետերի թիվը՝ հանելով առաջին փոխվարչապետի պաշտոնը, որի արդյունքում ներկայում գործող իրավակարգավորումների համաձայն առկա է երեք փոխվարչապետի պաշտոն, դրանց փոխարեն կլինի երկուսը։

Արտակ Զեյնալյանը առաջարկեց կրճատել նախարարությունների թիվը՝ 17-ի փոխարեն սահմանելով 12 նախարարություն։

«Առաջարկում եմ միաձուլել մշակույթի, սպորտի և երիտասարդության հարցերի, ԿԳ նախարարությունները՝ ստեղծելով ԿԳ, մշակույթի և սպորտի նախարարություն։ Միաձուլվող նախարարությունների բոլոր լիազորությունները պահպանվելու են։ Միջազգային փորձի տեսակետից նման ձևաչափով նախարարություն գործում է օրինակ՝ Վրաստանում, Ճապոնիայում։ 

Առաջարկում եմ միաձուլել գյուղատնտեսության նախարարությունն ու տնտեսական զարգացման և ններդրումների նախարարությունները՝ ստեղծելով Էկոնոմիկայի նախարարաություն։

Միաձուլել էներգետիկ ենթակառուցվածքների և բնական պաշարների նախարարությունն ու ՏԿԱ նախարարությունը՝ ստեղծելով տարածքային կառավարման և ենթակառուցվածքների նախարարություն, որին կփոխամցվեն նաև տրանսպորտի, կապի և տեղեկատվական տեխնոլոգիաների նախարարության կողմից իրականացվող տրանսպորտի, ճանապարհների ոլորտին առնչվող բոլոր լիազորությունները և գործառույթները։

Նախագծի փաթեթով նախատեսվում է նաև տրանսպորտի, կապի և տեղեկատվական տեխնոլոգիաների նախարարությունը վերանվանել բարձր տեխնոլոգիաների արդյունաբերության նախարարություն,։

Առաջարկվում է նաև Սփյուռքի նախարարությունը միավորել նաև վարչապետի աշխատակազմին՝ ստեղծելով Սփյուռքի գործերով գլխավոր հանձնակատարի ինստիտուտ»,-ասաց նախարարը։