«Իմ քայլը» խմբակցության հետ հանդիպումից հեռանում եմ շատ գոհ. ՍԴ դատավորի թեկնածու

Ինչպես արդեն տեղեկացրել էինք, Ազգային ժողովում տեղի ունեցավ «Իմ քայլը» խմբակցության և ՍԴ դատավորի թեկնածու Գոռ Հովհաննիսյանի համատեղ փակ քննարկումը:

Քննարկումից հետո ԼՈւՐԵՐ.com- ի հետ զրույցում ՍԴ թեկնածուն նշեց, որ հանդիպումից գոհ է հեռանում. «Ինչպես նախորդ խմբակցությունների, այդպես էլ «Իմ քայլը» խմբակցության հետ իմ հանդիպումը դրական մթնոլորտում եղավ, և ես հիմա հեռանում եմ շատ գոհ»,-ասաց Գոռ Հովհհաննիսյանը: Խոսելով պատգամավորների կողմից հնչեցված հարցերից, ՍԴ թեկնածուն նշեց, որ դրանք չէին տարբերվում նախորդ խմբակցությունների հարցերից:

«Հիմնականում սահմանադրական իրավունքի և Սահմանադրական դատարանի վերաբերյալ հարցեր էին, նույն հարցերն էին, որոնք հնչեցնում էին նախորդ խմբակցությունների հետ հանդիպման ընթացքում և լրագրողմերի կողմից: Քննարկեցինք բացառապես սահմանադրական իրավունքին վերաբերող հարցեր»,-ասաց Գոռ Հովհաննիսյանը:

Նրա խոսքով` հարցադրումներից, այնուամենայնիվ, չի զգացել, թե «Իմ քայլը» խմբակցությունը հակվա՞ծ է ընտրել իրեն, թե ոչ, քանի որ հարցերը մասնագիտական են եղել, և որևէ մեկը չի նշել, թե կողմ կամ դեմ է իր թեկնածությանը:

Հարցին, թե ինչ լուրջ անելիքներ է տեսնում Սահմանադրական դատարանի կողմից և ինչ խնդիրների առաջնահերթ լուծում կտա, եթե ընտրվի ՍԴ դատավոր, Գոռ Հովհաննիսյանը պատասխանեց. «Մեր սահմանադրական իրավունքի հարցերի վերաբերյալ շատ մոտեցումների հետ համամիտ չեմ: Շատ հարցերում ես ունեմ բոլորովին այլ կարծիք, տարբեր խնդիրների լուծման վերաբերյալ տարբեր մոտեցումներ և փորձելու եմ Սահմանադրական դատարանում աշխատելու դեպքում լուծումները տալ: Ինչ վերաբերում է կոնկրետ օրինակով խնդիրների, ապա ես կարծում եմ, որ հնարավոր չէ օրենքի բացը ճանաչել անվավեր և հակասահմանադրական, որը որ այսօր մեր Սահմանադրական դատարանն է անում: Բացի այդ, մեկ այլ օրինակ` հիմնական իրավունքները չեն գործում մասնավոր անձանց միջև, այդ որոշումը ևս պետք է փոխվի»,- եզրափակեց Գոռ Հովհաննիսյանը:

Սիլվի ՏԻԳՐԱՆՅԱՆ