Հաբեթնակ Կուրղինյանը՝ ըմբիշների ելույթների մասին

Ազատ ոճի ըմբշամարտի Հայաստանի հավաքականի գլխավոր մարզիչ Հաբեթնակ Կուրղինյանը հայ երիտասարդ ըմբիշներից լավ արդյունքներ է ակնկալում: Lրագրողների հետ հանդիպման ժամանակ Կուրղինյանը նշեց, որ հայ մարզիկները բոլորն էլ մտնում են գորգ հաղթանակի համար, իսկ արդյունքները ցույց կտան մեդալները: «Արսեն Հարությունյանն ապացուցեց, որ գոյություն չունի անուն, երկիր, այլ կա միայն լավ պատրաստված մարզիկ: Նույնն էլ Վազգեն Թևանյանի դեպքում, երբ կարողացավ հաղթել աշխարհի ուժեղագույն ըմբիշներից մեկին»,- ասաց գլխավոր մարզիչը:

Ըստ Կուրղինյանի, հավաքականում կարող է սերնդափոխություն լինել, երիտասարդ ըմբիշները ունակ են լավ արդյունքի հասնել: «Մինչև «Տոկիո 2020»-ը կփորձենք անել ամեն ինչ, որպեսզի տղաները կարողանան լավ մասնակցել: Ամբողջ թիմը ունի այդ հնարավորությունը: Ես ոչ ոքի չեմ առանձնացնում: Մինչև եվրոպական խաղերն ունենք հավաքներ, այդ ընթացքում կընտրենք այն մարզիկներին, որոնք կմեկնեն մրցմանը: Կախված անցկացրած մարտերից՝ կորոշվի՝ ով է լավագույնը»,- հավելեց նա:

Մարզիչները գոհ են թիմի բարոյահոգեբանական վիճակից, մարզիկների փոխհարաբերություններից: Կուրղինյանի խոսքով` առաջնայինը թիմային ոգին է, ոչ թե արդյունքները:

Ազատ ոճի ըմբշամարտի հավաքականը Եվրոպական խաղերի 4 ուղեգիր է նվաճել` 57 կգ, 65կգ, 97կգ և 125 կգ քաշային կարգերում:

Հայաստանի ազատ ոճի հավաքականի կազմում  Բուխարեստում կայացած Եվրոպայի առաջնությունում միակ ոսկե մեդալը ապրիլի 10-ին նվաճել է 61 կգ քաշային Արսեն Հարությունյանը: Վազգեն Թևանյանը էլ Սերբիայում մարտի 9-ին դարձել էր մինչև 23 տարեկանների Եվրոպայի չեմպիոն: