Մենք չենք զիջելու. Էդմոն Մարուքյան

Այսօր` ապրիլի 15-ին, Աժ Պետական-իրավական հարցերի մշտական հանձնաժողովի նիստի ընթացքում մերժվեց «Լուսավոր Հայաստան» խմբակցության կողմից` ՀՀ առավարությանն առաջարկվող ծրագիրը՝ միտված սուպերվարչապետական կարգի վերացմանը: Խմբակցության ղեկավար Էդմոն Մարուքյանը հայտարարեց՝ վարչապետ Նիկոլ Փաշինյանը ժամանակին խոստացել էր ԱԱԾ-ին և ոստիկանությանը տալ նախարարությունների կարգավիճակ, սակայն իր խոստումը չիրականացրեց:

«Իշխանության կողմից ներկայացված նախագծի հիմքում որևէ չափման միավոր, հիմք հանդիսացող ալգորիթմ չկա: Իշխանության ներկայացուցիչները հիմնականում հայտարարում էին, թե իրենք շատ են, իրենց ընտրել են շատերը, մեզ քիչ մարդիկ, հետևաբար, կառավարությունն է որոշում, թե ինչ կառուցվածք ունենա: Թե ինչպես են հանգել այդ որոշմանը, արտախորհրդարանական ուժերի կարծիքը հաշվի են առել, թե ոչ, այդ առումով որևէ հոդաբաշխ հիմնավորում չկա: Եթե մենք պիտի մեկ տարի սպասեինք, որ կառավարության նման չհիմնավորված նախագիծ ունենայինք, կարծում եմ` ամոթ է»,- ասաց Էդմոն Մարուքյանը:

ԼՈւՐԵՐ.com-ի հարցին, թե ինչո՞վ կարող էր պայմանավորված լինել իրենց խմբակցության կողմից առաջարկված նախագծի մերժումը, Մարուքյանը պատասխանեց. «Ամեն դեպքում, մենք չենք զիջելու, շարունակելու ենք մեր գործելաոճն այն առումով, որ Հայաստանն ունենա ժողովրդավարական կառուցվածք: ժողովրդավարությունն էմոցիոնալ հասկացություն չէ, այլ ինստիտուտներ, համակարգեր, որոնք պետք է ներդրվեն երկրի երկարատև զարգացման համար: Մեր նախագծի մերժումը պայմանավորված էր նրանով, որ իշխանությունը պատրաստ չի մեր ներկայացրած հարցերի շուրջ քննարկումներ ունենալ և այն պատասխանները, որ մենք շատ ենք, այդ պատճառով այդպես ենք որոշել, դա ժողովրդավարական պատասխան չի»,-ասաց Էդմոն Մարուքյանը:

Ամփոփելով իր խոսքը, Մարուքյանը նշեց, որ կառավարության կողմից ընդունելի սուպերվարչապետական համակարգը, որը քննադատվում էր ժամանակին բոլորիս կողմից, պահպանվում է նաև նոր իշխանության օրոք` լավ հետևանքներ չի ունենալու և դա ընթացքում կարող ենք տեսնել:

Սիլվի ՏԻԳՐԱՆՅԱՆ