Արարատ Միրզոյանի նախագահությամբ ԱԺ խորհրդի նիստ է հրավիրվել

Ապրիլի 15-ին տեղի է ունեցել ՀՀ ԱԺ խորհրդի նիստը, որը վարել է խորհրդարանի նախագահ Արարատ Միրզոյանը:

Քննարկվել եւ հաստատվել են Ազգային ժողովի յոթերորդ գումարման երկրորդ նստաշրջանի օրակարգում լրացումներ կատարելու մասին եւ ապրիլի 16-ին գումարվող հերթական նիստերի օրակարգի նախագծերը, սահմանվել է հերթական նիստերի օրակարգային հարցերի քննարկման հաջորդականությունը: «Կառավարության կառուցվածքի եւ գործունեության մասին» ՀՀ օրենքում փոփոխություններ եւ լրացումներ կատարելու մասին» եւ «Պետական տուրքի մասին» ՀՀ օրենքում լրացում կատարելու մասին» ու կից օրենքներում լրացում եւ փոփոխություն նախատեսող օրենսդրական փաթեթների քննարկման համար կտրամադրվի մինչեւ 3 ժամ:

Ազգային ժողովի յոթերորդ գումարման երկրորդ նստաշրջանի օրակարգում լրացումներ կատարելու մասին նախագծում ընդգրկվել է 22, ապրիլի 16-ին գումարվող հերթական նիստերի օրակարգի նախագծում` 19 հարց:

Խորհրդի համաձայնությանն է արժանացել Գվատեմալայի Հանրապետության Կոնգրեսի եւ ՀՀ Ազգային ժողովի միջեւ միջխորհրդարանական համաձայնագիր ստորագրելու մասին առաջարկությունը:

Լրացում է կատարվել «ԱԺ բարեկամական խմբեր ստեղծելու մասին» ԱԺ խորհրդի որոշման մեջ. կձեւավորվի Հայաստան-Կոստա Ռիկա բարեկամական խումբ:

Լրացում է կատարվել նաեւ «ԱԺ 7-րդ գումարման բարեկամական խմբերի կազմերը հաստատելու մասին» ԱԺ խորհրդի որոշման մեջ: Ըստ այդ լրացման՝ Հայաստան-Թուրքմենստան բարեկամական խումբը կղեկավարի Վարազդատ Կարապետյանը՝ «Իմ քայլը» խմբակցությունից: