Տրանսգենդերի ելույթը շահարկելու պատճառով Հայաստանը խնդիրներ ունի ԵԽԽՎ-ում․ Էդմոն Մարուքյան

«Չկա հարց, որից մենք խուսափենք: Մենք խուսափել ենք ԲՀԿ-ՔՊ բանավեճից կամ վեճից»-հայտարարեց «Լուսավոր Հայաստան» խմբակցության ղեկավար Էդմոն Մարուքյանը` պարզաբանելով, թե ինչու իրենց կուսակցությունը չանդրադարձավ Ազգային ժողովում տրանսգենդերի ելույթին:

«Եղել են խորհրդարանական լսումներ և լսումների ընթացքում ելույթ են ունեցել հրավիրված մարդիկ, այդքան բան: Ես չեմ մտնի այն դաշտ, որտեղ պիտի գնահատական տամ, թե լսումներն ինչպես պիտի կազմակերպվեն կամ ինչ պիտի արվի»- ասաց Էդմոն Մարուքյանը: Պատգամավորի խոսքով, նույն ընթացքում, երբ Հայաստանում տրանսգենդերի ելույթին դեմ ցույցեր և բողոքներ էին ընթանում, ԵԽԽՎ-ում ցը շրջանառության մեջ է դրվել այն հարցը, որով ասում է, որ Հարավային Կովկասում սեռական փոքրամասնությունների և տրանսգենդեր անձանց իրավունքների ոտնահարում կա:

«Ձեր` սիրելի լրագրողներիդ շնորհիվ, տրանսգենդերի ելույթի հարցը այդքան շահարկելու շնորհիվ, տարատեսակ սուր մթնոլորտ ձևավորելու շնորհիվ այդ բանաձևում դոմինանտ հատված կա Հայաստանին վերաբերող: Հայաստանը հիմա այդ բանաձևի հետ կապված խնդիրներ ունի ԵԽԽՎ-ում, դրա համար շնորհակալություն ձեզ, որ այդ հարցն այդքան հետևողականորեն բարձրացրեցիք և այնտեղ Հայաստանի համար խնդիրներ ստեղծեցիք»- ասաց Էդմոն Մարուքյանը:

ԼՈւՐԵՐ.com-ի հարցին, թե դրանում որն է լրագրողների մեղքը, արդյոք չպե՞տք է լուսաբանվեր այդ ելույթի հետևանքով եղած բողոքի ցույցերը, Մարուքյանը պատասխանեց․

«Ոչ, լուսաբանեիք, բայց այդ օրը խորհրդարանը քննարկել է տնտեսական հանձնաժողովի կողմից ներկայացվող ֆունդամենտալ նախագիծ, որը վերաբերել է մարդկանց լավ և վատ ապրելուն, ՓՄՁ-ների զարգացմանը, ի՞նչ է, այդ հարցերը կարևոր չէին, որ այդպես չլուսաբանվեցին և ամենակարևորը այդ ելույթն էր: Եթե այդ բանաձևն ընդունվի, Հայաստանը կհայտնվի դատապարտվող երկրների շարքում: Բանաձևում հիշատակվում էր հարավկովկասյան երեք երկրների` Հայաստանի, Ադրբեջանի, Վրաստանի անունները, որտեղ այդ սեռական խտրականությունը գործում է: Մեզ հավասար հարթության վրա են դնում Ադրբեջանի հետ և դա լավ չէ»-ասաց Էդմոն Մարուքյանը նշելով, որ մենք` հատկապես Հեղափոխությունից հետո Ադրբեջանից առաջ ենք, բայց այդ բանաձևով մեզ բերում և հավասարեցնում են նրանց:

Ամփոփելով իր խոսքը, Էդմոն Մարուքյանը նշեց, որ տեղեկությունները գուցե նորություն էին, որովհետև մեր մամուլը դեռ տեղյակ չէ այդ մասին:

Սիլվի ՏԻԳՐԱՆՅԱՆ