Շատ ավելի կարևոր խնդիրներ ունենք լուծելու, որտեղ կարող էր ուղղվել 124 միլիոնը

Ինչպես արդեն տեղեկացրել էինք, կառավարությունը որոշում կայացրեց 124 միլիոն ՀՀ դրամ տրամադրել վարչապետի աշխատակազմին` «Քաղաքացու օրը» տարբեր ծրագրերով նշելու համար:

ԼՈՒՐԵՐ.com-ը փորձեց հասկանալ, թե պատգամավորներն ինչպես են գնահատում այս որոշումը: «Լուսավոր Հայաստան» խմբակցության պատգամավոր Տարոն Սիմոնյանը նշեց, որ ինքը ձեռնպահ է քվեարկել այս օրը տոն հռչակելուն և ժամանակավրեպ է համարում, թե´ տոնի ընդունումը, թե´ գումարներ ծախսելը:

«Այո, ժամանակավրեպ էր նաև այսքան խոշոր գումար տրամադրել այդ օրվա միջոցառումներն անցկացնելու համար: Մենք այսօր շատ ավելի կարևոր խնդիրներ ունենք լուծելու, որտեղ կարող էին ուղղվել այդ միջոցները: Կարևոր են, իհարկե, տոներն էլ, միջոցառումներն էլ, բայց դա պետք է համաչափ լինի: Քաղաքացու համար կարևոր է իր առօրյա խնդիրների լուծումը: Ես զանգեր եմ ստանում Լոռու մարզի գյուղերի բնակիչներից, իրենց ճանապարհների անբարեկարգ լինելու և մի շարք խնդիրների ահազանգով: Մեր երկրում խնդիրները բազմազան են և առկա միջոցները պետք է խնայողաբար օգտագործվեն»,-ասաց Տարոն Սիմոնյանը:

ԼՀԿ-ից Սարգիս Ալեքսանյանը նշեց, որ դա բավականին մեծ գումար է, և լավ կլինի, որ քաղաքացիներն անմիջականորեն օգտվեն դրանից. «Անգամ համերգները, եթե լինելու են՝ լինեն, օրինակ` սահմանամերձ համայնքներում, որտեղ մշակութային միջոցառումների կարիք ունեն և պակասը լրացնելու հնարավորություն կլինի։ Դա, համեմատաբար, ավելի դրական եմ գնահատում, քան որ մարդիկ առհասարակ զրկված լինեն նման միջոցառումներից: Ես կողմ եմ քվեարկել քաղաքացու օրվան, բայց, կարծում եմ, որ սեղմ գների սահմանում պիտի արվի»- ասաց Սարգիս Ալեքսանյանը:

«Բարգավաճ Հայաստան» խմբակցության պատգամավոր Արման Աբովյանը զարմացավ. «Ճիշտն ասած, զարմացած եմ և հենց նոր իմացա այդ մասին: Չեմ ուզում քննարկել Կառավարության որոշումը, բայց կվերահաստատեմ մեր դիրքորոշումը այդ օրվա հետ կապված: «Քաղաքացու օրը» ոչ միայն այդ օրվա տոնախմբությունն է, այլև քաղաքացու օր է ամեն օր և նշելու լավագույն տարբերակը աշխատանքն է: Բացասական կամ դրական կարծիք հայտնելու համար վաղ եմ համարում, պետք է դեռ հասկանանք, թե 124 միլիոնով ինչ ծրագրեր են իրականացնելու, միգուցե սոցիալական ծրագրեր են իրականացնում»,- ասաց Արման Աբովյանը:

ԲՀԿ-ից Միքայել Մելքումյանը նշեց, որ, իհարկե, պետք է լուծել մի շարք խնդիրներ, բայց հետաքրքիր է, թե ի՞նչ միջոցառումներ են իրականացվելու. «Եթե այդքան գումարը ուղղվելու է այնպիսի միջոցառումների իրականացմանը, որոնք մեր երկրին լրացուցիչ պլյուսներ են բերելու, ապա դա նորմալ է, բայց կառավարությունը դեռ չի հայտնել, թե ինչպես է ծախսելու, այդ պատճառով դեռ այսքանը կմեկնաբանեմ»,-եզրափակեց Մելքումյանը: