Արհամարհանք չկա

Ազգային ժողովը երկու անգամ չի կարողացել ընտրել ՍԴ դատավոր:

Թեկնածուներից Գոռ Հովհաննիսյանը ընտրություններից հետո մեզ հետ զրույցում ասել էր, թե ինքը չգիտի՝ ինչու Ազգային ժողովն իրեն չընտրեց, բայց  բոլոր փաստաթղթերը ներկայացրել է, բոլոր նախապայմանները բավարարել է և, հավանաբար, իր չընտրվելը քաղաքական ենթատեքստ է ունեցել:

ՀՀ Նախագահը դեռևս թվով երրորդ թեկնածուին չի ներկայացրել, սակայն արդեն տպավորություն է ստեղծվել, որ խնդիրը նախագահ-իշխող ուժ հարաբերությունների մեջ է: Ազգային ժողովում լրագրողները ԱԺ նախագահից հարցրին արդյոք արհամարհանք չկա՞ նախագահի նկատմամբ, քանի որ տպավորություն է՝ արհամարվում են իր առաջարկած թեկնածուները.

«Այս գումարման Աժ-ն առաջին անգամ չի ընտրել ՀՀ նախագահի առաջարկած թեկնածուին: Նախագահի լիազորություններից է այն, որ թեկնածու առաջարկի, իսկ Ազգային ժողովն իրավունք ունի ընտրել կամ չընտրել: Հստակ պիտի արձանագրենք, որ դա որևէ վերաբերմունք չի արտահայտում թեկնածու առաջադրած ինստիտուտի վերաբերյալ»,-ասաց Արարատ Միրզոյանը:

Խոսելով «Իմ քայլը» խմբակցության պատգամավորների` ՍԴ թեկնածու Գոռ Հովհաննիսյանին տրվող հարցերին, Միրզոյանը շեշտեց, որ ամենայն պատասխանատվությամբ վստահեցնում է՝ «Իմ քայլ»-ի պատգամավորներին ոչ ոք չի ուղղորդում ո՛չ հարցերի, ո՛չ ելույթների, և ո՛չ էլ ընտրությունների առումով. «Մյուս կողմից, ես չեմ այն մարդը, ով պիտի գնահատականներ տա պատգամավորների հնչեցրած հարցերին, եթե որևէ պատգամավորի հարց տարօրինակ, անկապ կամ ուղղորդված է թվում, ապա մոտեցեք՝ այդ պատգամավորին հարցրեք»-ասաց Արարատ Միրզոյանը:

Ամփոփելով իր խոսքը, Արարատ Միրզոյանն անդրադարձավ Աժ քառօրյա նիստերի թեժ միջադեպերով ընթացքին՝ նկատելով, որ խորհրդարանում լինում են նման թեժ քննարկումներ, հաճախ դուրս են գալիս բովանդակային քննարկումների շրջանակներից և այլ բնույթ են ստանում, բայց կարծում է, որ բոլոր խմբակցությունները պիտի փորձեն հնարավորինս մնալ բովանդակային քննարկումների շրջանակներում: