Վրդովեցուցիչ էր Աննա Մարգարյանի՝ ԲԴԽ անդամ չընտրվելը. իմքայլական պատգամավոր

Ինչպես հայտնի է, Ազգային ժողովի «Իմ քայլը» խմբակցության կողմից առաջադրված ԲԴԽ անդամի թեկնածուն չընտրվեց։ Այս անգամ խորհրդարանական մեծամասնությունն առաջադրել էր Աննա Մարգարյանի թեկնածությունը, ով 66 կողմ, 19 դեմ ձայների հարաբերակցությամբ չընտրվեց։

Թեկնածուի չընտրվելու և առաջացած քննադատությունների մասին ԼՈՒՐԵՐ.com-ը զրույցեց «Իմ քայլը» խմբակցության պատգամավոր Արուսյակ Ջուլհակյանի հետ։

-Ի՞նչ տպավորություններ ունեիք Աննա Մարգարյանի վերաբերյալ։ Հարց- պատասխան փուլում իր կողմից տրված պատասխանները Ձեզ բավարարե՞լ էին։

- Ես անձամբ շատ տպավորված էի, բավականին պրոֆեսիոնալ տպավորություն թողեց ինձ վրա տիկին Մարգարյանը։ Նախ նշեմ, որ շատ ուրախ էի, որ վերջապես մենք դիտարկում էինք կին թեկնածու։

Բայց, իհարկե, ես միշտ կարևորում եմ թեկնածուի մասնագիտական կարողությունները, հետո նոր գենդերային հավասարության հարցը։ Ինձ համար կրկնակի անգամ ուրախալի էր, որ մենք ունենք նման պատրաստված կին թեկնածու։ Հարց ու պատասխանից և, ընդհանրապես նրա խոսքից ու ներկայացրած ծրագրից, ես անձամբ տպավորված եմ և շատ կուզենամ, որ ունենայինք նման ԲԴԽ անդամ։ Ինձ համար վրդովեցուցիչ էր այն, որ նա չընտրվեց՝ կարելի է ասել տեխնիկական պատճառներով։

- Մեծամասնության առաջադրած թեկնածուի չընտրվելը մարդիկ վերագրեցին անլուրջ խորհրդարան ունենալուն։ Ինչպե՞ս եք վերաբերում այդ քննադատություններին և ո՞րն էր թեկնածուի չընտրվելու «տեխնիկական պատճառը»։

-Խորհրդարանի լուրջ չլինելու վերաբերյալ մեկնաբանություններին բացասաբար եմ վերաբերվում, նման բան չկա։ Տեսականորեն նորմալ է, որ մեծամասնության առաջադրած թեկնածուն կարող է չընտրվել։ Շատ նորմալ է, որ հարց ու պատասխան փուլում թեկնածուն չբավարարի այլ ուժերի և չընտրվի, բայց սա ակնհայտորեն այդ դեպքը չէր։ Տեխնիկական խնդիրն այն էր, որ «Իմ քայլը» խմբակցության իմ գործընկերների մեծամասնությունը գործուղման էր և մենք գոնե մեր խմբակցությամբ չկարողացանք 80 ձայն ապահովել։

Նաև շատ ցավում եմ, որ իմ ընդդիմադիր գործընկերները` «Լուսավոր Հայաստան» խմբակցության պատգամավորները, ինչ-ինչ քմահաճույքներից ելնելով, իրենց համար էլ շատ ցանկալի թեկնածուին մերժեցին։ Ինձ համար անընդունելի է, որ նման անհասկանալի պատճաբանություն բերելով նրանք մերժեցին այդ թեկնածուին, ինչի պատճառով մենք չունենք նման որակյալ կադր ԲԴԽ-ում։

-Հնարավոր չէ՞ր այս հարցի քննարկումը հետաձգել, որպեսզի գործուղումների պատճառով ընտրությունը չտապալվեր։

-Մենք ժամկետներով կաշկանդված էինք, քանի որ օրենսդրությունը հստակ ժամկետներ է տալիս, թե քանի օրում մենք կարող ենք թեկնածու առաջադրել և ընտրել։ Այս պահին հստակ չեմ կարող ասել` հնարավոր էր հետաձգել, թե՝ ոչ։ Նորից եմ ասում՝ շատ ցավում եմ և մի փոքր հույս դեռ պահպանում եմ, որ գուցե կարողանանք տիկին Մարգարյանին համոզել, որ նա նորից առաջադրվի։

- «Լուսավոր Հայաստան»-ը կարծես նեղացկոտություն ցուցաբերեց, դուք մերժել էիք իրենց թեկնածուին, իրենք էլ, փաստորեն, մերժեցին Աննա Մարգարյանին: 

-Իրենց թեկնածուին մերժելու պատճառն այն էր, որ չէր բավարարում ԲԴԽ-ի համար օրենսդրությամբ նախատեսված պայմաններից մեկին, որով թեկնածուն պետք է ունենա 15 տարվա աշխատանքային փորձ։ Որպես մասնագետ իրենց կողմից առաջադրված թեկնածուն ընդունելի էր մեզ համար, սակայն օրենքով սահմանված պահանջներ կան, որոնք չենք կարող շրջանցել։

-Գուցե, անլրջություն ասելով, մարդիկ դա՞ նկատի ունեն:

-Ես չեմ կարող պատասխանել իմ ընդդիմադիր գործընկերների փոխարեն, իրենք ավելի լավ կմեկնաբանեն իրենց կողմից արված քայլը։ Ես կհասկանային նրանց, եթե թեկնածուն իրենց համար ընդունելի չլիներ, բայց նրանք ասում են, որ այս թեկնածուն հենց այն հրաշալի թեկնածուն է, որին իրենք սպասում էին և նման պատճառաբանություն բերելով չեն ընտրում։