Ինչու է ԱԺ նիստը վարում Վահե Էնֆիաջյանը, ոչ թե Լենա Նազարյանը

ՀՀ ԱԺ նիստն այսօր վարում է ԱԺ ընդդիմադիր փոխնախագահ Վահե Էնֆիաջյանը, քանի որ ԱԺ նախագահ Արարատ Միրզոյանը գործուղման է մեկնել արտերկիր, և ԲՀԿ-ական Էնֆիաջյանն այս պահին համարվում է ԱԺ նախագահի ժամանակավոր պաշտոնակատար։ Հետաքրքրական է, որ այս ընթացքում Հայաստանում է գտնվում իշխանության ներկայացուցիչ փոխնախագահ Լենա Նազարյան, սակայն այդ պատասխանատու աշխատանքը վստահել է Վահե Էնֆիաջյանին, ոչ թե իր գործընկերոջը՝ Լենա Նազարյանին, ինչը վկայում է թիմում ոչ ամուր հիմքեր ունենալու մասին:

ԱԺ աշխատակազմի ղեկավարի տեղակալ Թաթուլ Սողոմոնյանը, մեզ հետ զրույցում մեկնաբանելով ԱԺ նախագահի որոշումը, նշեց, որ վերջինս է որոշում, թե իր բացակայության ժամանակ որ տեղակալը փոխարինի իրեն․ «Այս ամիսների ընթացքում և՛ Ալեն Սիմոնյանը, և՛ Լենա Նազարյանը կատարել են Արարատ Միրզոյանի պարտականությունները։ Սա առաջին անգամն է, երբ ընդդիմադիր գործիչն է փոխարինում նրան։ Այստեղ իմ ու քո չկա, տեղակալները հավասար են, հետո՞ ինչ, որ մեկն ընդդիմության ներկայացուցիչ է։ Դա չի նշանակում, որ այդ տեղակալը երբևիցե ԱԺ նախագահի պարտականությունները չի կատարելու նրա բացակայության ժամանակ»,- ասաց նա՝ մեջբերելով, որ ԱԺ կանոնակարգ օրենքը սահմանում է, որ տեղակալի առաջին պարտականություններից մեկը փոխարինումն է ԱԺ նախագահին։

Թե ինչու ԱԺ նախագահի պարտականությունների կատարման լիազորությունը չի տրվել, օրինակ՝ ԱԺ փոխնախագահ Լենա Նազարյանին, փոխարենը պաշտոնը վստահվել է հենց Էնֆիաջյանին, Սողոմոնյանը նշեց, որ իրավունքների հավասարության սկզբունքը կխախտվի, և այդ դեպքում էլ կարող էին միակողմանիության մեջ մեղադրել ԱԺ նախագահին։