19-ամյա երիտասարդը դանակահարել է երկու անչափահասի

Ոստիկանության Էրեբունու բաժնում հիվանդանոցից հուլիսի 25-ին՝ ժամը 22:00-ին, հաղորդում է ստացվել, որ «որովայնի և վերջույթների ծակած-կտրած վերք» ախտորոշմամբ իրենց մոտ բուժօգնության է դիմել 15-ամյա պատանի։ Քիչ անց ստացվել է հիվանդանոցային երկրորդ հաղորդումը՝ «ձախ գոտկային շրջանի, ձախ բազկի վերին երրորդականի, ձախ ազդրի վերին երրորդականի ծակած-կտրած վերքեր» ախտորոշմամբ բուժօգնության է դիմել 16-ամյա պատանի:

Ինչպես տեղեկացրին ՀՀ ոստիկանության հասարակայնության հետ կապի և լրատվության վարչությունից, մեկնած օպերատիվ խմբի ծառայողները պարզել են, որ ժամը 21.00-ին Էրեբունի-Ազատամարտիկներ փողոցների խաչմերուկի մոտ ծագած վիճաբանության ժամանակ, անհայտ անձը կտրող-ծակող գործիքով հարվածել է պատանիներին:

Հուլիսի 27-ին փաստի առթիվ հարուցվել է քրեական գործ՝ ՀՀ քրեական օրենսգրքի 112 հոդվածի 1-ին և 113 հոդվածի 1-ին մասերի՝ դիտավորությամբ առողջությանը ծանր և միջին ծանրության վնաս պատճառելու հատկանիշներով:

Ոստիկանության Էրեբունու բաժնի և Երևան քաղաքի վարչության քրեական հետախույզների ձեռնարկած միջոցառումների շնորհիվ պարզվել է, որ հուլիսի 25-ին, վիճաբանության ժամանակ, պատանիներին դանակահարել է Տոլբուխինի փողոցի 19-ամյա մի բնակիչ։ Բացատրական աշխատանքների շնորհիվ նա հուլիսի 27-ին՝ ժամը 19.00-ին, ներկայացել է ոստիկանության Էրեբունու բաժին:

Ձեռնարկվում են միջոցառումներ հանցագործության գործիքը հայտնաբերելու ուղղությամբ: