Դատարանը մերժեց Արմեն Գևորգյանի խափանման միջոցի հարցով երկու միջնորդությունները

Ազգային անվտանգության խորհրդի նախկին քարտուղար, նախկին փոխվարչապետ, նախագահի աշխատակազմի նախկին ղեկավար Արմեն Գևորգյանի նկատմամբ ընտրված ստորագրություն չհեռանալու մասին խափանման միջոցը չի վերացվի։ Այս մասին քիչ առաջ հայտարարեց Երևանի ընդհանուր իրավասության դատարանի դատավոր Աննա Դանիեբեկյանը` մերժելով Գևորգյանի պաշտպանների միջնորդությունը։ Դատարանը միաժամանակ մերժեց Գեւորգյանին ժամանակավորապես երկրից բացակայելու թույլտվություն տալու վերաբերյալ միջնորդությունը։

Հիշեցնենք, որ Արմեն Գևորգյանին մեղադրանք է առաջադրվել «Մարտի 1»-ի գործով ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու եւ հանցավոր ճանապարհով ստացված գույքն օրինականացնելու մեջ: Նրա նկատմամբ խափանման միջոց է ընտրված չհեռանալու մասին ստորագրությունը: