Արցախում քրեակատարողական համակարգի բարեփոխումներ են իրականացվում

Արցախում քրեակատարողական համակարգի բարելավման ուղղությամբ կոնկրետ ծրագրեր են իրականացվում:

Այս մասին մամուլի սրահում հրավիրված ասուլիսում Արցախի Հանրապետության մարդու իրավունքների պաշտպան Արտակ Բեգլարյանը նշեց, որ աշխատանքներն ընթացքի մեջ են:

«Մինչև հիմա Արցախում քրեակատարողական հիմնարկը ոստիկանության կառավարման ներքո է գտնվում: Բարեփոխումներով նախատեսվում է քրեակատարողական հիմնարկը տեղափոխել Արդարադատության նախարարության կառավարում, ինչը ճիշտ է: Գործընթացն արդեն սկսվել է: Իհարկե, սա բավարար չէ, այդ ոլորտում հոգեբանական, ազատազրկվածների պայմանների, քաղաքացիական վերահսկողության հետ կապված հարցեր կան: Ես հետևողականորեն աշխատում եմ այս ուղղությամբ»,-ասաց Արտակ Բեգլարյանը

Անդրադառնալով մյուս ոլորտներում առկա խնդիրներին՝ Արցախի Հանրապետության ՄԻՊ-ը նշեց, որ բոլոր ուղղություններով էլ անելիք կա: Նա առանձնացրեց երեխաների իրավունքների պաշտպանության առնչությամբ հարցերը, որոնք կապված են կրթության հավասար հնարավորությունների, սոցիալական ապահովության իրավունքի հետ:

«Քանի դեռ համապարփակ չենք ուսումնասիրել այս ոլորտը, չեմ կարողանալու պրոֆեսիոնալ գնահատական տալ: Այժմ աշխատում ենք համապարփակ հետազոտության վրա, որպեսզի հիմնական խնդիրները վեր հանենք, դրանց չափելիություն տանք և փորձենք բարեփոխումներ իրականացնել»,-ասաց Արտակ Բեգլարյանը:

Նա առանձնացրեց նաև հաշմանդամություն ունեցող անձանց հետ կապված խնդիրները: Արտակ Բեգլարյանի խոսքով, սահմանափակ կարողություններով անձանց վերաբերող մոդելը բժշկական է, որը Խորհրդային Միության տարիներից է գալիս, և այստեղ ինստիտուցիոնալ խնդիրներ կան: Կան խնդիրներ փախստականների իրավունքների հետ կապված, որոնք և՛ ներքին են, և՛ պայմանավորված են հակամարտությամբ: