Լևոն Սարգսյանը զենքերը գցում և ասում է՝ «պատմական զենքեր են». մարդ է խփվել դրա՞ համար են պատմական

«Մարտի 1-ի» գործով տուժողի շահերի ներկայացուցիչ Սեդա Սաֆարյանն, այսօր անդրադառնալով քրեական գործի ընթացքին ու հետագա հնարավոր զարգացումներին, նշեց, որ պաշտպանական կողմն ամեն ինչ անում է, որպեսզի դատաքննությունն ուշ սկսվի և մեղադրական եզրակացությունը չհնչի, ապացույցների հետազոտում տեղի չունենա։

Ըստ նրա՝ գործի ձգձգումները կշարունակվեն և ՀՀ 2-րդ նախագահ Ռոբերտ Քոչարյանի պաշտպանական կողմը որոշ միջնորդություններ ևս կներկայացնի, իսկ Քոչարյանի դրսում մնալը կարող է ազդել արդարադատության իրականացման վրա:

Սաֆարյանը նշեց, որ զեկուցագրեր են կեղծվել․ «Հետագայում համապատասխան պաշտոնյաները հարցաքննվել են և ընդունել, որ հետին թվով զեկուցագրեր են կազմվել և դրանով ընդունել են, որ չի եղել օպերատիվ տեղեկություն, որ հանրահավաքի մասնակիցները զինամթերք են պահում»,- ասաց փաստաբանը:

Նա քրգործի ցուցմունքներից մի դրվագ հիշեց՝ նշելով, որ մարտիմեկյան իրադարձությունների օրերին օլիգարխ Լևոն Սարգսյանը զենքերը գցել է ու ասել, թե դրանք պատմական զենքեր են․ «Նախկին ոստիկանապետ Հայկ Հարությունյանի ցուցմունքը կարող էր առաջացնել անցանկալի հետևանքներ, քանի որ, ըստ երևույթին նրան որպես մեղադրյալ ներգրավելու հարց է առաջացել, Հարությունյանը գիտակցել է և նրա հետ տեղի ունեցավ այն ինչ տեղի ունեցավ (խմբ․՝ սեպտեմբերի 24-ին նրա դին գտան իր առանձնատանը): Երբ վկան ցուցմունք է տալիս և ասում, որ օլիգարխ Լևոն Սարգսյանը եկավ, զենքերը գցեց ու ասաց՝ սրանք պատմական զենքեր են։ Ես կուզեմ, որ իրենք գան ու դատարանում ասեն, թե դրանք ինչո՞վ են պատմական, որ դրանով մարդ է խփվել դրա՞ համար: Ու էդ վկան իրենց շրջապատից է, այս իշխանության մարդ չէ, որ ասեն իրենց վրա անիմաստ ցուցմունք է տալիս»,- նշեց փաստաբանը: